VOV4.K’ho- Nàng pleh lơh bơtờp virus Sars CoV-2 tàm mpồl bơtiàn, càr Dăk Nông neh sồr ală mpồl lơh broă geh gơnoar di tŭ lơh jăt ală broă lơh jăt sền, ai ơm yah ngài, tam pà gùng gơwèt mờ ală cau rê bơh tiah geh kòp nàng rơcăng sơndră kòp Covid-19.

Tàm anih gròi sền kòp Cai Chanh là gùng mŭt bơh sơnrờp tàm ală càr Tây Nguyên: Mpồl lơh broă geh gơnoar càr Dăk Nông neh mhar tam pà gùng lòt rê dipal, tơrmù ƀà jơnau ală rơndeh ơm, tơkơn nàng pleh lơh bơtờp kòp. Mơkung jăt sền niam mat ală cau rê ơm kis tàm càr Dăk Nông mờ yal ai gơnoar ătbồ in nàng ătbồ, ai ơm yah ngài jăt di jơnau cih bơh kơrnoat boh lam dê.

Jăt tơrgùm kờp bơh gah lơh broă geh gơnoar càr Dăk Nông dê, kờp bơh tŭ ală càr tiah đah jum dà lơgar lơh jăt broă ơm yah ngài mpồl bơtiàn pah ngai kờp bal geh rlau 5 rbô nă cau đì rơndeh măy rê tus ală càr Tây Nguyên. Tàm Dăk Nông, ală ngai rềp ndo làng bol bơh ală càr rê gơguh tus mờr 1 rbô nă cau.

Cau mblàng Lơ Mu K’Yến