VOV4.K’ho- Ngai 20/7, Mpồl đơng lam rơcăng sơndră kòp bơtờp tàm kòn bơnus càr Dăk Nông dê neh wàng se kơryan hìu duh broă Ủy ban Nhân dân xã Quảng Sơn, kơnhoàl Dăk Glong, tài bơh geh cau bơtờp kòp Covid-19 tus tàm anih do lơh broă. Jơnau là bè do, dờp geh jơnau yal bơh Anih tờm Gròi sền kòp tê jê să càr Dăk Lăk dê yal bè dùl nă cau pa gŏ bơtờp mờ kòp Covid-19 tàm càr Dăk Lăk yal tàm ngai 13/7 pa do neh lòt tus ù tiah xã Đức Xuyên, kơnhoàl Krông Nô mờ xã Quảng Sơn, kơnhoàl Dăk Glong, geh tam tìp mờ ơm rềp mờ bàr pe nă cau.

Hìu duh broă Ủy ban Nhân dân xã Quảng Sơn, kơnhoàl Dăk Glong dê lơh jăt broă lơh wàng se tŭ geh cau bơtờp kòp Covid-19

Càr Dăk Nông neh sồr 2 xã Đức Xuyên mờ Quảng Sơn mhar wàng se, cang tiah, lùp kờp, jòi tiah lòt rê, ơm yah ngài jăt jơnau sồr gơwèt mờ ală cau geh gơrềng, tam tìp mờ ơm rềp. Càr neh sồr wàng se kơryan tơn hìu duh broă Ủy ban Nhân dân xã dê nàng lơh niam broă lơh rơcăng sơndră kòp, sơrbac mhar lùp kờp, jòi lùp ală cau tam tìp ơm rềp bal, geh gơrềng bal tài bơh ngai 13/7, cau bơtờp kòp Covid-19 neh lòt tus hìu duh broă Ủy ban Nhân dân xã Quảng Sơn dê nàng lơh broă.

Cau mblàng Lơ Mu K’Yến