VOV4.K’ho – Càr Daklak tu\ do geh mờr 17 rbô 500 lồ tàu gam tàm tơngai tơnhàu. Tài gơtìp aniai bơh càl rbut dờng sồ 12, uă bă tàu gơtìp gơ pừ, cồng nha tơnhàu gơmù, khà sơdàng lơyah, khà priă tàu gơmù, lơh cau tam tàu gơtìp uă ngan kal ke:

Bi ùr Ngân Thị Tơ, ơm tàm [òn 13, xã Ea Pil, kơnhoàl M’drak pà git, hìu bơnhă geh 2 lồ ù tam tàu. Kàl lài, kơnờm sơngka sền gàr niam, trồ tiah niam den tàng tơnhàu geh mờr 220 tấn tàu, kờp jơh priă bơcri, hìu bơnhă gam geh priă cồng mờr 80 tơlak. Mơya, kàl tam tàu nam do, tài gơtìp aniai bơh càl rbut dờng sồ 12 tàm nhai 11 nam lài, lơh jơh bă tàu gơtìp gơ pừ jơh, lơh aniai tus bơta dờng pràn bơh tờm tàu dê tàm tơngai lơh gơs sơdàng den tàng cồng nha lơh geh mờ bơta niam tàu dê gơmù uă ngan. Bi ùr Ngân Thị Tơ đơs là: kàl do, priă lơh geh tơl nàng tơm wơl priă bơcri neh là bơtuah ngan: “Nam lài, cồng nha tơnhàu uă rlau mờ nam do, dùl lồ bol a` dê tàm do pal tơnhàu geh rlau 100 tấn. Mơya nam do, tài gơtìp aniai bơh càl rbut dờng pa do, tờm tàu gơtìp gơ pừ jơh den tàng cồng nha tơnhàu gơmù uă, làng bol gơtìp hoàc huơr uă ngan. Dùl lồ nam do digơlan mìng geh bơh 60 tus 70 tấn.”

Ai bi Lê Văn Đen, ơm tàm [òn 13, thị trấn Ea Knốp, kơnhoàl Ea Kar pà git: Hìu bơnhă bi dê lơh broă bal tam rlau 6 lồ tàu, kàl lài lơh geh mờr 300 tơlak priă. Mơya nam do trồ tiah ờ niam, cồng nha tơnhàu mờ bơta niam tàu dê gơmù, khà priă ơpah cau lơh broă gơguh jơnhua mờ ngan là khà priă tac tàu hìu mai\ in kung gơmù rlau mờ nam lài, den tàng hìu bơnhă bi gơtìp uă ngan kal ke. Bi yal: “Nam do priă ơpah cau koh tàu jơnhua ngan, tài tàu gơpừ, kal ke ngan nàng koh den tàng priă ơpah cau koh jơnhua rlau. Nam lài, priă ơpah cau mìng bơh 170 tus 180 rbô tàm 1 lồ, mơya tài tàu gơpừ den tàng nam do priă ơpah cau koh bơh 200 tus 220 rbô tàm 1 lồ. Ờ hềt kờp là tàu gơmù cồng nha tơnhàu, lơh khà sơdàng kung gơmù sơl. Kàl lài, kong ti blơi 930 rbô tàm 1 tấn, ai nam do khà sơdàng geh bơh 8 tus 10 phơng den hơ\ sồng kong ti blơi mờ khà priă 80, ai hơ đơm bơh 7 tus 8 phơng den khi blơi mìng gam 50% khà priă.”

Ồng Lê Tuân, Kuang atbồ Phòng nguyên liệu – Kong ti cổn phần tàu sơdàng 333 Daklak pà git, tu\ do, kong ti gam lơh broă bal blơi tàu ai mờr 7 rbô lồ tàu bơh ală hìu bơnhă cau lơh broă sa tàm 2 kơnhoàl là Ea Kar mờ M’drak. Kàl lơh tàu nam do, tài gơtìp aniai bơh càl rbut dờng sồ 12 den tàng jơh ală tiah tam tàu bơh kong ti lơh bal mờ ală hìu bơnhă làng bol gơtìp gơmù cồng nha tơnhàu mờ khà lơh geh. Nàng dong cau tam tàu sơr lèt gan kal ke, tơnơ\ mờ tu càl rbut dờng lơh aniai, kong ti neh tă 4 tơmàn 800 tơlak priă nàng dong ală hìu bơnhă gơtìp hoàc huơr. Ai bè broă blơi tàu, khà priă blơi tàu tu\ do gơmù là tài gơ rềng bơh Hiệp định ATIGA tu\ ngui dia blơi sơdàng bơh ală lơgar Đông Nam Á mut tàm Việt Nam geh lơh jat. Ồng Lê Tuân đơs loh: “Jat broă lơh blơi tàu bơh kong ti dê tu\ do, khà priă blơi tàu tàm suơn là mờnr 800 rbô tàm 1 tấn, hơ\ là gơmù 130 rbô tàm 1 tấn pơn drờm mờ nam lài. Jơnau bơh broă gơmù khà priă là tài lài do, khà priă sơdàng bơh 14 tus 15 rbô tàm 1 ki\, mơya nam do mìng gam 12 rbô tàm 1 ki\. Do là bơta gơ rềng bơh Hiệp định ATIGA dê, tu\ dia blơi sơdàng bơh lơgar ndai tàm Việt Nam gơmù bơh 40% gam 5%, ală hìu mai\ lơh sơdàng tàm lơgar pal tàm pơr lòng mờ ală hìu mai\ tàm tiah do.”

Tài trồ tiah lơh aniai, bă tàu gơtìp gơpừ, cồng nha tơnhàu gơmù, khà sơdàng lơyah, cau tam tàu tàm ală kơnhoàl đah mattơngai lik càr Daklak đal git, sơr lèt gan kàl tàu bơtang do nàng kơp kơnờm tàm kàl tam tàu nam tơnơ\. Mơya khi gam kờ` mờ broă tam tàu làh ờ, halà tam gơl tam chi tam ndai, tu\ mờ anih tơlik tac bơh chi tam do dê kung gam kal ke.

                Cau cih mờ yal tơnggit K’Duẩn