VOV4.K’ho – Ngai òr (11/10), tàm Trung tâm pơrjum càr Daknông neh bơyai lơh pơrjum ala mat cau jat yàng Bàp lơgar Việt Nam bơt bơtàu mờ sền gàr dà lơgar càr Daknông dơ\ 3, tơngai lơh broă bơh nam 2017 tus nam 2022.

Đơs tàm pơrjum, kuang đơng lam bồ càr Daknông sồr, tơngai tus, Ủy ban tam klac jat yàng càr Daknông pơnjat tai lam sồr, pơn jờng cau jat yàng bàp lơh ngan tus bal ală srơh pơr lòng kờ` gơboh dà lơgar bơh ală kơnă, ală gah lam lơh nàng rề ơnàng tus tơl nă cau, tơl hìu nhă; pơnjat tai lam sồr cau dong broă yàng, cau jat yàng lơh jat srơh “Gùt làng bol tam klac bal bơt bơtàu rài kis ngac ngar jak chài tàm [òn làng bol ơm kis, kis niam rài kis lơh àng sơdah jơnau yàng”, tơnguh niam nùs nhơm rơcang ngac tềng đap tơl kai bơh ală mpồl sò tơm dê, sơ mờm bơta pin dờn jat yàng nàng tam cah is mpồl tam klac dờng jơi bơtiàn.