VOV4.K’ho - Tàm dơ̆ cri bơyai tàm mpồl kwang bàng bè rơndăp broă cih Nghị quyết bè nam priă jền, priă dong kờl lơh jăt broă brồ guh mờ tơnguh bơtàu lơh sa mpồl bơtiàn, gơrềng tus mờ gah bơcri priă dà lơgar, ồng Trần Hoàng Ngân, Kwang atbồ Anih kơlôi sơnơng tơnguh bơtàu ƀòn dờng Hồ Chí Minh đơs là: Tàm khà 2 tơlăk 870 rơbô tơmàn đong priă bơcri bơh gùt lơgar tơngai bơh nam 2021 tus 2025, gam di pơgăp 297 rơbô tơmàn đong ờ hềt geh tam pà, pal nggui nàng bơcri ai ală tiah geh bơta pràn lơh gơguh kes priă là đah jum măt tơngai lik dà lơgar.

Kờp dŭ nam 2022, kờp jơh khà priă geh tă tàm kes priă dà lơgar là 1 tơlăk 500 rơbô tơmàn đong den tiah đah jum măt tơngai lik dà lơgar geh tus 40%. Tŭ do, Ƀộ Giao thông Vận tải neh yal mờ Quốk hội 12 rơndăp broă ngui priă bơcri dà lơgar tàm broă lơh gùng đah tô-đah jum. Tàm hơ̆, tiah đah jum măt tơngai lik bal mờ tiah ring dà dờng Cửu Long mìng geh 2 rơndăp broă lơh, tàm tŭ, tŭ do broă lơh gùng lòt tàm tiah hờ đah jum dà lơgar gam ờ pràn tơnguh bơtàu rơlao mờ tiah hờ đah tô dà lơgar.

Cau mblàng Ndong Brawl