VOV4.K’ho - Kờñ gàr niam broă ai ồs đèng drơng broă pơrlòng jơh bơsram cấp 3 nam 2021 mờr geh bơyai lơh, Điện lực Dak Nông neh bơ̆t bơtàu gùng dà broă rơcang geh ồs đèng, gàr broă ai ồs đèng ring niam ai ală anih pơrlòng in.

Điện lực Dak Nông gàr niam broă ai ồs đèng geh sùm drơng dơ̆ pơrlòng jơh bơsram cấp 3 nam 2021 in

Dơ̆ pơrlòng jơh bơsram cấp 3 nam 2021, càr Dak Nông neh 7 rơbô nă kơnòm bơsram dan cih măt pơrlòng tàm 18 mpồl duh broă pơrlòng. Nàng gàr niam broă ai ồs đèng crơng broă pơrlòng in, Cộng ty Điện lực Dak Nông pà gĭt geh ờ gơsơ̆t ồs đèng nàng lơh niam wơl di jăt mờ rơndăp broă neh geh ai tàm ală ngai geh bơyai lơh dơ̆ pơrlòng.

Bơdìh hơ̆ tai, công ty geh đơng lam ală gah lơh ồs đèng tàm mpồl bal lơh broă tơn mờ ală hìu bơsram geh bơyai lơh anih pơrlòng mờ ală anih geh ai mpồl duh broă drơng broă pơrlòng nàng pơgồp bal sền gròi khà ồs đèng hạ thế, gùng che ồs đèng bơh hìu bơsram nàng gŏ gờñ ală bơta ờ niam di gơlan gơtìp, pơlam hìu bơsram in ala ală phan ồs đèng ờ tơl niam. Mờ tàm ală anih pơrlòng, gah lơh ồs đèng geh ai cau lơh broă tus sền gròi mờ ală mpồl lơh broă ntrờn geh sền tơn tàm ală anih biến áp, nàng di tŭ bơsong tŭ gơtìp ală bơta gơbàn, mhar geh ồs đèng wơl ai anih pơrlòng in tàm tơngai gờñ ngan.

Cau mblàng Ndong Brawl