VOV4.K’ho- Mho ngai 10/12, tàm Hà Nội, Ƀộ Ngoại giao yŭ rơyùm bơyai lơh Dơ̆ tơngkah kir sơnrai 100 nam ngai deh ồng Nguyễn Kơ Thạc, lài do là Ủy viên Ƀộ Cíñ trị, Phó Củ tịc Hội đồng Ƀộ trưởng, Ƀộ trưởng Ƀộ Ngoại giao Việt Nam (1921- 2021).

Dơ̆ bơyai lơh tơngkah kir sơnrai 100 nam ngai deh ồng Nguyễn Kơ Thạc là dùl tàm ală broă lơh pơnrơ ngan tàm dơ̆ pơrjum ciñ trị kuơmàng, tàm hơ̆ geh: Pơrjum lơh broă mờ lơgar ndai gùt lơgar, Pơrjum cribơyai broă mờ lơgar ndai dơ̆ 31, Pơrjum Lơh broă mờ lơgar ndai kấp càr, ƀòn dờng dơ̆ 20 nàng kờñ lam lơh dùl ròt, tơl làm gùng dà lơh broă mờ lơgar ndai Pơrjum dơ̆ XIII bơh Đảng dê.

Đơs tàm dơ̆ bơyai lơh tơngkah kir sơnrai, Ƀộ trưởng Ƀộ Ngoại giao Việt Nam ồng Ƀùi Thañ Sơn đơs sùm rài kis lơh broă kăc màng pơnrơ ngan bơh ồng Nguyễn Kơ Thạc dê neh lời wơl uă jơnau bơsram kung gam bè ờs bơta kuơ gơwèt mờ broă lơh bơtàu tơnguh dà lơgar mờ gah lơh broă mờ lơgar ndai dà lơgar dê tŭ do.

Cau mblàng Lơ Mu K’Yến