VOV4.K’ho- Ngai 12/11, Bộ Lao động, Thương binh mờ Xã hội đơng lam, pơgồp bal mờ ală anih lơh broă bơh Liên hợp quốc dê tàm lơgar Việt Nam bơyai lơh Dơ̆ hòi jà lam lơh Nhai lơh broă tài ring bal ùr klau mờ rơcăng sơndră lài mờ bơta lơh pờng jăt tàm bơta ring bal ùr klau nam 2021 geh lơh bơh ngai 15/11 tus ngai 15/12 nam do bal mờ tơngume “Sền gàr ờdo ờdă rài kis mpồl bơtiàn, tơnguh gơnăp gơnoar mờ ai geh tŭ tơngai niam ai cau ùr mờ kơnòm ùr in nàng kờñ lơh jăt ring bal ùr klau mờ tơn jơh bơta lơh pờng gơwèt mờ cau ùr mờ kơnòm ùr”.

Broă lam lơh Nhai lơh broă tài ring bal ùr klau mờ rơcăng sơndră lài mờ bơta lơh pờng jăt tàm bơta ring bal ùr klau bơh nam 2016 tus tŭ do neh lơh gơlik geh ală jơnau gơdờp niam ngan, gơhòi gơ jà bơta tus bal jơh nùs, sền gròi mờ tàm sơm băt tê bal mŭt lơh bal bơh jơh gùt mpồl bơtiàn dê, pơgồp bơnah tơrmù bơta ờ ring bal ùr klau tàm jơh ală gah broă lơh. Sơñio khà bơtàu tơnguh ùr klau tàm khà uă, ai Việt Nam ơm dơ̆ 65 tàm khà 162 dà lơgar mờ ơm tàm mpồl jơnhoa ngan rlau jơh tàm 5 mpồl tàm dunia.

Kuơmàng, broă ai lơh jăt Broă lơh mblàng yal jơnau bè ring bal ùr klau tus nam 2030 tơngŏ bơta sền gròi uă ngan bơh Chính phủ dê gơwèt mờ broă lơh mblàng yal jơnau bè ring bal ùr klau. Dơ̆ hòi jà lam lơh Nhai lơh broă nam 2021 hòi jà jơh ală gah geh gơrềng mờ làng bol lơh jăt mờ lam lơh ală broă lơh geh kuơ ngan nàng tơnguh ring bal ùr klau mờ rơcăng sơndră lài mờ jơh broă lơh tam cah is ờ rờm bal tơm bơh bơr mờ lơh pờng jăt tàm bơta ring bal ùr klau.

 Cau mblàng Lơ Mu K’Yến