VOV4.K’ho - Dơ̆ kah kơlôi làng bol mờ kuang bàng, cau ling phi să, chơ̆t tàm dơ̆ kòp Covid-19 geh Ủy ban MT Dà lơgar Việt Nam mờ Ủy ban Nhân dân ƀòn dờng Hồ Chí Minh pơgồp bal lơh geh bơyai lơh tàm tŭ 8 jơ mang do Ngai 19 nhai 11 tàm 2 anih pờ Hà Nội mờ ƀòn dờng Hồ Chí Minh.

Tàm mờr 2 nam do, kòp Covid-19 gơtìp neh lơh aniai uă ngan tus mờ gùt dunia, tàm hơ̆ geh lơgar he. Bŭ lah gùt Đảng, gùt làng bol, gùt ling klàng neh tus bal jơh pràn mờ nùs nhơm “tam dră mờ kòp gơtờp bè tam dră mờ ling sò tơm”, ai bơta pràn kơl dang să jan bal mờ broă ờ do ờ dă tus mờ màng kis làng bol rơlao jơh, lài jơh, mơya kòp gơtờp pràn ngan, ờ hềt tŭ lơi  gơbàn. Rơlao 1 tơlăk nă cau gơtìp Covid-19; kòp neh lơh rơlao 23 rơbô nă làng bol, kuang bàng mờ cau ling gơtìp chơ̆t. tàm tŭ pơgăp 8 jơ 30 phút mang do, tàm ƀòn dờng Hồ Chí Minh, Hà Nội geh bơyai lơh ală broă chu ñàng, chu jrềng, pơrdô đèng bơkào tàm dà. Ală hìu yàng geh jan klờng kah kơlôi, ală ơhò tàm ală dà dờng tàm ƀòn dờng Hồ Chí Minh geh ơhŭ, tàm uă tiah, làng bol geh lam sồr gơsơ̆t ồs đèng, chu ñàng kah kơlôi.

Cau mblàng Ndong Brawl