VOV4.K’ho - Ngai òr (15/11), Ban Thường trực Ủy ban Mặt trận dà lơgar Việt Nam neh tơlik sră nggal pơyoa tus Ban Thường trực Ủy ban Mặt trận Dà lơgar Việt Nam ală càr, ƀòn dờng mờ kuang đơng lam ală mpồl jăt yàng bè dơ̆ lơh kah kơlôi làng bol gơtìp chơ̆t tài kòp Covid-19 lơh aniai.

Sră nggal cih loh, Dơ̆ kah kơlôi cau gơtìp chơ̆t tài kòp Covid-19 geh bơyai lơh nàng kah kơlôi rơlao 20 rơbô nă cau mờ kuang bàng, cau ling gùt lơgar neh gơtìp chơ̆t, phi să tài kòp Covid-19; tơlik nùs nhơm moăt jrùng uă ngan, broă tam pà bal tềng đăp mờ ală roh rui, chơ̆t jê bơh git nđờ jơ̆t rơbô hìu nhă neh chơ̆t cau pròc mhàm, lơh geh nùs nhơm tàm sơnđàc bal, gơboh bal; pơn jăt tai lam sồr nùs nhơm ală mpồl cau gam tus bal tàm broă rơcang sơndră mờ kòp Covid-19. Do kung là dơ̆ nàng tơnguh bơhiàn tam klăc bal, lơh ngan ai jơh bơta pràn bơh dà lơgar, sơrlèt mờ kal ke, bơta tơlòng, gơdờp ờ do ờ dă, ndrờm bal, gròi sền geh cồng nha kòp Covid-19, brồ guh lơh sa, kă bro, tơnguh bơtàu lơh sa mpồl bơtiàn, bơ̆t bơtàu mờ sền gàr dà lơgar.

Cau mblàng Ndong Brawl