VOV4.K’ho- Nàng kờñ dong kờl cau tus bal pơrlòng mờ cau hìu bơnhă cau pơrlòng dê tàm dơ̆ pơrlòng jơh bơsram kấp pe nam 2021, dơ̆ lam lơh uă broă lơh dong kờl kàl pơrlòng nam do geh bơyai lơh bơh ngai 6 tus ngai 9/7 tus do. Do là jơnau yal tàm dơ̆ pơrjum băo bơh Mpồl cau bơsram dờng dà lơgar Việt Nam, Bộ Giáo dục mờ Đào tạo, Tập đoàn Thiên Long bơyai lơh ngai 27/5.

 Broă lơh “Dong kờl kàl pơrlòng” geh bơyai lơh tàm jơh ală tiah pơrlòng bơh dơ̆ pơrlòng jơh bơsram kấp pe nam 2021, tàm 63 càr, ƀòn dờng dê. Jat hơ̆, Mpồl rơndap broă lơh geh tơrgùm tàm broă lơh pràn broă mblàng yal, yal tơngĭt ală gah bơsram jơnau pơrlòng pờ tơlik tơn tàm internet pin dờn mờ tơmŭt ală video bơsram jơnau pơrlòng, bơsram jơnau pơrlòng jơh bơsram kấp pe tàm ală gah mblàng yal. Bơdìh hơ̆, lam lơh ală broă lơh dong kờl is pờ tơlik tàm internet bơh ală mpồng yal tơngĭt jơnau tàm internet, tàm tơrƀŏ đah cau dong kờl is mờ ală cau pơrlòng kờñ geh bơta dong kờl; bơt bơtàu gùng dà broă lơh dong kờl gơwèt mờ ală kơnòm bơsram geh rài kis kal ke tàm tiah sar lơgar ngài, tiah nhàr lơgar, tiah ƀồt ƀơlào, dà lềng, tiah kal ke uă.

Cau mblàng K’Hạnh