VOV4.K’ho- Ngai 05/9, bal mờ gùt lơgar, kơnòm bơsram ală càr tàm tiah Tây Nguyên neh geh dùl dơ̆ sơnđờm mut nam bơsram pa krơi is ngan mut nam bơsram pa 2021-2022 tàm bơta kòp Covid-19 gam gơlik geh kal ke. Là càr mìng dùl lơm tàm tiah Tây Nguyên dê ờ hềt geh cau kòp Covid-19 tàm mpồl bơtiàn, mơya nàng rcang sơndră kòp, dơ̆ sơnđờm mut nam bơsram pa 2021-2022 geh gah Giáo dục mờ Đào tạo càr Kon Tum bơyai lơh jat broă lơh pờ tơlik tơn tàm internet bơh ală anih sơñio rùp, gah pờ tơlik jơnau đơs bơh Anih jơnau đơs -Sơnñio rùp càr dê mờ bàr pe gah tờm pờ tơlik tơn tàm internet.

\

Kon Tum ngai sơnđờm mut nam bơsram pa ờ geh kơnòm bơsram

Nam bơsram pa, càr Kon Tum geh rlau 164 rơbô nă kơnòm bơsram bơh kấp mầm non tus kấp pe. Tơnơ̆ dơ̆ mut nam bơsram pa, ngai do, 6/9, kơnòm bơsram tàm càr dê geh sơnđờm ngai bơsram sơnrờp tàm hìu jat broă lơh pờ tơlik tơn tàm internet. Càr neh jàu ai ală hìu bơsram in rcang bơyai lơh tàm pà tơl mpồl kơnòm bơsram ngan ngồn nàng sac rơwah broă lơh mblàng yal jơnau gĭt wă geh cồng nha ngan rlau jơh.

Kung bơyai lơh Dơ̆ sơnđờm mŭt nam bơsram pa dùl bă ki ngàm, jơh nùs ngan, lơh dùl êt gời lơm bơh gùng pờ tơlik sơñio rùp tơn, rlau 392 rbô nă kơnòm bơsram tàm 714 hìu bơsram tàm càr Gia Lai neh rơcăng mŭt tàm nam bơsram pa. Nàng gơ in dipal mờ bơta kòp bơtờp, bơh ngai 06/9, gah bơto bơtê Gia Lai bơyai lơh bơto mờ bơsram jăt 2 broă lơh. Jăt mờ hơ̆, kơnòm bơsram tàm 2 tiah gam lơh jăt Chỉ thị 16 bơh Thủ tướng Chính phủ dê là ƀòn dờng Pleiku mờ thị trấn Phú Túc, kơnhoàl Krông Pa geh bơsram bơh tàm internet. Kơnòm bơsram ală tiah gam wơl geh bơsram bal tàm ơdŭ. Ală hìu bơsram tàm Gia Lai kung neh rơcăng phan bơna, lơh niam wơl phan bơna măy mok yal tơngĭt jơnau, rơcăng lơh jăt broă bơto bơsram bơh tàm internet tàm tŭ dilah gơ jal ir.

Gia Lai sơnđờm mŭt nam bơsram pa

Tàm Dăk Lăk, ală hìu bơsram kung bơyai lơh sơnđờm mŭt nam bơsram pa 2021- 2022 tàm drim ngai 05/9 jăt broă lơh pờ tơn bơh tàm internet, nàng kờñ lơh ờdo ờdă, lơh mhar, lơh dùl êt gời, geh kuơ ngan, tơngŏ nùs nhơm tam pà bal, pơndờm pơnđiang kơnòm bơsram, cau pơgru sơrlèt gan kal ke nàng lơh niam kơnòl broă bơto mờ bơsram. Nam bơsram do, jơh gùt càr Dăk Lăk geh rlau 450 rbô nă kơnòm bơsram ală kấp. Tềng đăp bơta kòp bơtờp, Dăk Lăk neh tơn rŭc ing tơngai sơnđờm nam bơsram pa tus tàm ngai 15/9, nàng gah bơto bơtê bal mờ làng bol in geh tŭ tơngai rơcăng gơ in niam ngan rlau jơh ală bơta lam lơh bơto mờ bơsram.

Kơnòm bơsram Dăk Lăk bơsram pờ tơlik tơn bơh tàm internet

Mờ bơta rơcăng lài wil tơl, Dăk Nông là càr mìng dùl lơm tàm Tây Nguyên bơyai lơh Dơ̆ sơnđờm mŭt nam bơsram pa tàm ală hìu bơsram, mơya lơh jăt broă ơm yah ngài 50-50. Mìng is Lâm Đồng geh ai kơnòm bơsram in tus wơl hờ hìu bơsram tàm ngai 15/9 mờ bơyai lơh sơnđờm mŭt nam bơsram pa tàm ngai 18/9.

Cau mblàng LơMu K'Yến - K'Hạnh