VOV4.K’ho- Mho ngai 08/4, dơ̆ tàm jàu broă lơh bơh Thủ tướng Chính phủ dê geh lơh tàm hìu lơh broă Chính phủ đah Thủ tướng ồng Phạm Minh Chính mờ Chủ tịch lơgar ồng Nguyễn Xuân Phúc- lài do là Thủ tướng Chính phủ mờ yal kơrnuat tơn pồ 2 Phó Thủ tướng mờ 2, 3 nă Bộ trưởng, kuang geh jơng ndai bơh Chính phủ dê tơngai lơh broă bơh nam 2021 tus nam 2026.

Đơs tàm dơ̆ bơyai lơh, Chủ tịch lơgar ồng Nguyễn Xuân Phúc nting bơr gờm chờ Thủ tướng pa ồng Phạm Minh Chính, ală Phó Thủ tướng, Bộ trưởng, kuang atbồ gah broă lơh pa geh dờp kơrnuat tơn pồ. Mơkung ưn ngài Bộ Chính trị, Ban Bí thư, Ban Chấp hành Đảng dà lơgar, Quốc hội, Mặt trận dà lơgar Việt Nam, ală anih lơh broă tàm mpồl chính trị mờ ală rơnàng làng bol neh dong kờl, lơh broă bal, lơh gơlik bơta niam mờ ring bal nàng Chính phủ tơngai lơh broă bơh nam 2016 tus nam 2021 lơh gơs niam kơnòl broă neh ai tơlik, pơn iờ să tài neh lơh ngan tă pơgồp jơh pràn, drơng broă dà lơgar, drơng broă làng bol, tă pơgồp tàm ală cồng nha bơh Chính phủ dê 5 nam do, lam dà lơgar brồ guh tus dùl cơnđuà kuơmàng.

Cau mblàng K’Duẩn