VOV4.K’ho- Ồng Bùi Văn Cường Tổng thư ký Quốc hội, Chánh Văn phòng Mpồl duh broă tĕ khà dà lơgar đơs nền dơ̆ tĕ khà Kuang bàng Quốc hội khoá 15 mờ Kuang bàng Hội đồng Nhân dân tơngai lơh broă bơh nam 2021-2026 neh bơyai lơh geh cồng nha niam bơnĕ. Khà cau tĕ khà lòt tĕ khà gùt lơgar là 95,65%, tiah uă ngan rlau jơh geh  99,92%, tiah lơyah ngan rlau jơh rlau 84%. Bơta do tơngŏ tàm ală cau tĕ khà gùt lơgar, bơh tiah kơh bơnơm tus tiah ring, bơh tiah drà tus tiah ƀòn lơgar, tiah kơh bơnơm, tiah nhàr lơgar, ƀồt bơlào, dà lềng neh chờ hờp, hô hơng lòt pồ, lơh jat gơnoar mờ kơnòl broă bơh he dê. Bơta pin dờn tàm Đảng, Dà lơgar kung bè cau tĕ khà sac rơwah geh ală Kuang bàng he sền gŏ pin dờn tàm ală anih lơh broă geh gơnap gơnoar dà lơgar, jơnhoa ngan rlau jơh là Quốc hội kung bè Hội đồng Nhân dân ală kấp. Dùl nùs nhơm chờ hờp, chờ hờñ, tam klăc bal, rềp mềr bal mờ dùl bơta pin dờn tàm bơta đơng lam bơh Đảng, Dà lơgar dê.

Làng bol Tây Nguyên mờ ngai chờ tĕ khà

Bal mờ gùt lơgar, rlau 4 tơlak nă cau tĕ khà tàm ală càr Tây Nguyên neh lòt đùh sră tĕ khà Quốc hội khóa 15, Hội đồng Nhân dân ală kấp tơngai lơh broă bơh nam 2021 tus nam 2026. Dơ̆ tĕ khà neh geh lơh mờ nùs nhơm bơh ngai chờ dờng dê. Uă tiah đùh sră gơñ geh 100% cau tĕ khà lòt pồ. Mờ bơta rơcang lài jơh nùs, den tàng bulah mờ bơta krơi is geh uă tiah ngài kal ke, kòl yan, tĕ khà tàm ală càr Tây Nguyên kung gam geh lơh mờ nùs nhơm bơh ngai chờ dờng dê. Bal mờ tàm ală anih tam cah is kòp Covid-19, anih wàng se tài geh cau bơtờp kòp, cau tĕ khà kung gam chờ hờp lơh jat gơnoar mờ kơnòl bơh làng bol dê. Tĕ khà tàm Tây Nguyên geh lơh ờdo ờdă, ƀuơn ƀuài. Uă tiah tàm Tây Nguyên neh geh khà cau tĕ khà lòt pồ uă ngan, bè Lâm Đồng, geh 5 tàm 12 kơnhoàl, ƀòn dờng geh rlau 80% cau tĕ khà lòt pồ. Cát Tiên, là kơnhoàl ngài ngan rlau jơh, geh rlau 90%. Tàm Dak Lak, kơnhoàl Cư Kuiñ geh 100% cau tĕ khà lòt pồ.

Cau mblàng K’Hạnh mờ K’Duẩn