VOV4.K’ho- Mho ngai 28/10, Thủ tướng Chính phủ ồng Phạm Minh Chính neh bal mờ ală kuang đơng lam bồ mpồl ASEAN tus bal dơ̆ tơn jơh pơrjum kuang bàng dờng màng mpồl ASEAN dơ̆ 38 mờ 39 mờ ală Pơrjum kuang bàng dờng màng geh gơ rềng mờ dơ̆ tàm jàu gơnoar broă Chủ tịch ASEAN nam 2022 ai lơgar Campuchia in.

Đơs tơn jơh mờ gơnoar broă là Chủ tịch ASEAN nam 2021, Bơtau lơgar Brunei đơs nền, bulah ală kal ke tài bơh broă gơlik geh kal ke bơh kòp Covid-19 dê mơya ASEAN pơn jat tai bơtàu tơnguh kơ̆ kơljap, pràn kơldang. Wèt tus tơngai tơnơ̆ do, bơtau lơgar Brunei sồr pal pơn jat tai tơnguh ală broă lơh ngan bơt bơtàu mpồl bơtiàn ASEAN jat bơnàng jă tơnguh rài lơh broă uă lơgar mờ bơt bơtàu dùl rơndap tap sèng kơ̆ kơljap pràn kơldang tàm tiah do.

Dờp gơnoar broă Chủ tịch ASEAN nam 2022, Thủ tướng lơgar Campuchia yal tơngume nam Chủ tịch ASEAN 2022 là “ASEAN lơh broă sơndră bal ală bơta lòng” tài bơta gơ rờm bal, ring lơngai mờ pas sơm tàm tiah do, chồl pràn bơt bơtàu dùl mpồl bơtiàn ndrờm bal, kơ̆ kơljap, pràn kơldang mờ gơ glòm jơh ală bơta, di mờ nùs nhơm tờm ngan bơh ASEAN dê là bal mờ gơp tơnguh dùl broă wèt sền, dùl bơta niam chài, dùl mpồl bơtiàn.

Cau mblàng K’Duẩn