VOV4.K’ho- Mho ngai 23/3, tàm Hà Nội, Đoàn ơruh pơnu Cộng sản Hồ Chí Minh gơwèt Bộ Kuang àng bơyai lơh dơ̆ tơngkah kir sơnrai 90 nam Ngai crơng gơs Đoàn ơruh pơnu Cộng sản Hồ Chí Minh mờ dờp rò Gai lòng Sền gàr Dà lơgar khà II.

Đơs tàm dơ̆ bơyai lơh tơngkah kir sơnrai, ồng Tô Lâm Bộ trưởng Bộ Kuang àng sồr ală kuang bàng Đoàn ală kấp mờ đoàn viên ơruh pơnu tàm Kuang àng làng bol pal gĭt wă jrô, wil tơl broă gơlik geh, kơnòl broă lơh broă Kuang àng; lơh jăt ală jơnau sồr, kơrnoat bơh Đảng dê nàng lam lơh ală srơh, ală broă lơh dipal nàng kờñ lơh gơhòi gơ jà, ngui niam gơnoar broă lam lài bơh rơnàng kơnòm să dê tàm broă lơh jăt jai pha kơnòl broă chính trị, bơ̆t bơtàu Đảng, bơ̆t bơtàu mpồl Kuang àng làng bol sàng goh, pràn kơldang kơ̆ kơl jăp.

Di tàm dơ̆ do, ala măt kuang bàng đơng lam bồ Đảng, Dà lơgar, ồng Tô Lâm Bộ trưởng Bộ Kuang àng neh jàu pà Gai lòng Sền gàr Dà lơgar khà II ai Đoàn ơruh pơnu Bộ Kuang àng in tài bơh ală cồng nha jak ngan tàm broă tam lơh mờ pơlam tàp rơcăng tam lơh, pơgồp bơnah tàm broă lơh bơ̆t bơtàu mờ sền gàr dà lơgar Việt Nam mpồl bơtiàn ring bal làng bol lơh tờm.

 Cau mblàng Lơ Mu K’Yến