Dờp phan pà lồi nam geh phe, dà toh mờ ờ uă bơta phan ngui tàm broă bơsram sră, H’ Yến Niê, bơsram ơdŭ 8B, hìu bơsram cấp 2 Ngô Mây, xã Ea Mdroh, kơnhoàl Cư̆ Mgar chờ hờp ngan tài phan pà do geh dong kờl mè bèp tơmù priă tă pah ngai. Să tờm oh geh tai phan ngui nàng drơng tàm broă bơsram sră. Khà priă do là bơh rơndăp broă “Dong kờl jŏ jòng”, mpồl Tài bol oh kờñ gơboh kơnhoàl Cư̆ Mgar kung gam pà pah nhai tàm mờr 1 nam do, lam sồr oh H’ Yến sơlơ lơh ngan rơlao tàm broă bơsram sră: “Tơngai do oh neh dờp priă bơsram dong kờl bơta pràn jŏ jòng, geh ală cau pơgru dong kờl pah nhai mờ cèng phan pà tus hờ hìu. Bơdìh hơ̆ tai, oh gam tus bal mờ ơdŭ bơsram kờñ gơboh, geh ală pơgru tus bơto ờ sa priă môn toán, văn, anh văn, geh sền jơnau yal yau mờ phan nhơl niam. Oh gơlơh chờ hờp ngan mờ pin dờn rơlao, oh geh lơh ngan bơsram jăk, gơlòng sồr, dờn ƀơr mè bèp nàng pơgru ờ moăt”.

Dong kờl jŏ jòng là rơndăp broă geh mpồl Tài bol oh kờñ gơboh kơnhoàl Cư̆ Mgar lơh bơh bồ nam 2021 ai ală kơnòm bơsram gơtìp kal ke mờ kơnòm bơsram kòn cau tàm kơnhoàl. Jăt mờ hơ̆, ală cau tàm mpồl geh pơgồp bal, lam sồr tơl nă cau geh nùs nhơm niam “dong kờl” dùl nă kơnòm bơsram geh rài kis gơtìp kal ke mờ broă dong kờl priă pah nhai tàm tơngai ală kơnòm bơsram lòt bơsram jŏ jòng tus tàm tŭ tơn jơh kấp bơsram. Khà priă dong kờl là 240 rơbô đong pah nhai mờ tơl nă kơnòm bơsram mầm non mờ kấp 1, 290 rơbô đong pah nhai mờ tơl nă kơnòm bơsram kấp 2. Tàm nam 2021, mpồl do neh pơgồp bal mờ dong kờl ai 103 nă kơnòm bơsram, mờ kờp jơh khà priă mờr 150 tơlăk đong.

Mpồl kung geh uă rơndăp broă ndai nàng lơh pơgồp bal mờ kơnòm bơsram tàm tiah làng bol kòn cau bè: Ơdŭ bơsram kờñ gơboh bơto ờ sa priă ai kơnòm bơsram in, pà be ròng nàng ai geh broă lơh, broă sa tàm hìu nhă kơnòm bơsram gơtìp kal ke in; bơto re dà ờ sa priă ai kơnòm dềt in, lơh hìu dong kờl ha là jào pà ală Tùh sră ơdŭ bơsram nàng tơnguh uă bơta chài rơgơi sền sră ai ală kơnòm bơsram in.

Kuơ màng, tàm kòp Kovid-19 dơ̆ 4 gơtìp, mpồl do kung neh geh uă broă dong kờl kơnòm bơsram bè Sră măi ai kơnòm bơsram in ha là pà điện thoại dong kờl kơnòm bơsram nàng geh phan bơsram pờ tơlik tàm internet in. Oh H’ Mít Knul, bơsram ơdŭ 8B, hìu bơsram kấp 2 Ngô Mây, xã Ea Mdroh, kơnhoàl Cư̆ Mgar geh dờp điện thoại ngăc ngar mờ sim 4G bơh broă lơh do pà git: “Tàm tơngai pa do den oh neh dờp geh dùl nơm điện thoại nàng bơsram online. Điện thoại dong kờl oh gơtùi bơsram niam rơlao. Oh ưn ngài uă ngan tus mờ ală cau pơgru mờ ală mlŏ, wa geh nùs nhơm niam neh dong kờl oh nàng gơtùi bơsram niam rơlao mờ tơnơ̆ do dờng, oh kơ̆p kờñ geh jòi broă lơh niam nàng dong kờl wơl ală kơnòm dềt rơƀah bè oh dê tŭ do”.

Geh crơng gơs nhai 8 nam 2019, Mpồl Tài bol oh kờñ gơboh gơwèt Hội đồng đội kơnhoàl Cư̆ Mgar là mpồl lơh broă nùs nhơm dong kờl Dà lơgar tàm Tây Nguyên gơwèt Anih lơh broă nùs nhơm dong kờl Dà lơgar, Đoàn ơruh pơnu dê. Mpồl tŭ do geh 32 nă, tơl nă cau dùl broă lơh mơya geh bal mờ jơnau kờñ là drơng gàr, bơto bơtê ală kơnòm bơsram tàm tiah gơtìp kal ke in. Bi Mai Văn Chuyền, pơgru bơto tàm hìu bơsram kấp 2 Ngô Mây, atbồ mpồl do pà git: “Broă kal ke bơh ală kơnòm bơsram dê di lah geh broă tam pà bal jơh ală cau in, bơh mpồl bơtiàn in den hơ̆ kung geh là bơta pràn ai ală bol oh in git bơta kuơ bơh broă tam pà bal, broă dong kờl bơh ală cau ai ală bol oh in den tơnơ̆ do geh là dùl jơnau bơsram bè nùs nhơm niam nàng ai ală bol oh in tơnơ̆ do. Tàm tơngai tus den mờ gùng dà broă lơh bè hơ̆ den mpồl gam wèt tus mờ ală broă lơh geh nùs nhơm kơl jăp, jŏ jòng mờ geh broă gơrềng bal jrô ơnàng tus mờ ală bol oh mờ tus mờ mpồl bơtiàn, ai geh broă sền gròi bơh ală cau tus mờ broă bơto bơtê mờ tơnguh bơtàu kơnòm dềt dê, tàm hơ̆ uă ngan là kơnòm dềt kis tàm tiah sar lơgar ngài, tiah ƀòn lơgar”.

Tàm nam 2021, mpồl neh hòi jà geh mờr 1 tơmàn đong nàng lơh jăt ală broă lơh. Bơh tŭ hơ̆, dong kờl ai git nđờ rơhiang nă kơnòm dềt mờ kơnòm bơsram geh dờp bơh broă lơh do. Lŏ Lý Thị Hồng Trị, Kuang atbồ mpồl lơh broă nùs nhơm dong kờl dà lơgar tàm Tây Nguyên gơwèt Anih Lơh broă nùs nhơm dong kờl Dà lơgar, Đoàn ơruh pơnu dà lơgar đơs, do là dùl tàm ală mpồl lơh broă nùs nhơm dong kờl tài mpồl bơtiàn geh pơnrơ ngan tàm càr Dăk Lăk dê mờ neh geh uă broă pơgồp bal niam tàm ală broă dong kờl rơcang sơndră mờ kòp Kovid-19, geh đoàn ơruh pơnu Dà lơgar pơn jờng tàm nam do. “Mpồl bơh bi Mai Văn Chuyền dê den geh lơh ngan tàm ală broă lơh mpồl dê tàm broă lơh nùs nhơm dong kờl is. Tàm do là cau pơgru mơya ală cau pơgru do kung tus bal uă ngan mờ ală broă lơh bơh ală cau pơgru dê ndrờm geh kuơ màng, bơcri priă ai kơnòm bơsram bơsram in. Bè bơto bơsram ai ală kơnòm bơsram ờ jăk in, hìu rơƀah ờ tơl priă nàng lòt bơsram. Dong kờl sră măi, sră cih tŭ kơnòm bơsram rơcang mŭt bơsram nam bơsram pa in, ào ram, ƀảo hiểm y tế. Bơto sồr ai ală kơnòm bơsram tàm tiah ngài ai ală kơnòm bơsram in git wă mờ lơh ngan sơrlèt mờ kal ke”.

Tơn jơh nam 2021, ală cau tàm mpồl Tài bol oh kờñ gơboh kơnhoàl Cư̆ Mgar pơrjum bal, cri bơyai bal nàng ai geh ală gùng dà broă lơh nùs nhơm dong kờl tàm nam pa tai. Gam sùm tài jơnau kờñ bal là wèt tus mờ kơnòm dềt tàm tiah kal ke, mpồl pơn jăt tai ai geh ală broă lơh geh kuơ bè pà sră ƀảo hiểm y tế ai kơnòm bơsram gơtìp kal ke in, pờ ơdŭ bơto jơnau bơsram, jơnau git wă ai ală kơnòm dềt geh dong kờl do in nàng pơn jăt tai lơh broă bal mờ ală kơnòm dềt do dê. Kơnờm mờ hơ̆, geh tai uă kơnòm dềt geh dong kờl, geh tai bơta pràn nàng pơn jăt tai bơsram sră, ròng niam nùs nhơm kơ̆p kờñ gơs cau geh kuơ ai ală hìu nhă, mpồl bơtiàn in.

Cau cih H’ Xíu-Cau mblàng Ndong Brawl