VOV4.K’ho - Tàm drim òr (10/08), tàm ƀlàng rơndeh ơm miền Đông mờ ƀlàng rơndeh ơm miền Tây, UBND ală càr Dăk Lăk, Kiên Giang pơgồp bal mờ UBND ƀòn dờng Hồ Chí Minh bơyai lơh ai ală rơndeh rò làng bol rê hờ ƀòn lơgar tờm mờ broă dong kờl rơndeh bơh Công ty Phương Trang.

Broă rơndăp lơh geh rơcang nền nòn ngan, làng bol geh ai tàm ală tiah krơi is jăt tơl kơnhoàl nàng rê, gàr niam bơta ngài. Jơh ală làng bol ndrờm geh sră xét nghiệm kòp Covid-19 gam geh ngui ha là geh xét nghiệm mhar tơn tàm ƀlàng rơndeh ơm. Geh uă ală cau rê hờ ƀòn lơgar tờm tàm dơ̆ do là cau lơh broă roh broă lơh, cau bơsram dờng, cau tus hờ ƀòn dờng Hồ Chí Minh geh broă is mờ gơtìp kòl tŭ lơh jăt broă tam cah ngài mpồl bơtiàn. Tàm mho ngai 10 nhai 8, tàm ƀlàng rơndeh ơm miền Đông, UBND càr Phú Yên kung neh bơyai lơh rò nàng bol càr Phú Yên rê dơ̆ 6 mờ rơlao 600 nă cau.

Cau mblàng Ndong Brawl