VOV4.K’ho- Nam 2022, bơdìh mờ bơta gơ rềng bè broă gơlik geh khà priă phan bơna tàm drà kă bro dunia, bơta rồn bơklơn gơguh khà priă tàm lơgar gam tus bơh broă rơndap lơh tam gơl khà priă 2, 3 broă drơng ala dà lơgar jat broă rơndap lơh drà kă bro, 2, 3 bơta phan geh priă blơi gơguh jơnhua, tam gơl bơh khà priă xăng zờu tàm drà kă bro dê... jơnau yal tơnggit pal sền gròi ngan tàm Pơrjum broă gơlik geh tàm drà kă bro, khà priă phan bơna tàm lơgar Việt Nam nam 2021 mờ đơs lài nam 2022.

Nam 2022, rài lơh sa Việt Nam geh đơs lài geh bơtàu tơnguh wơl mờ bơtàu tơnguh pràn kơldang, khà gơguh roh bơngă khà priă nam 2022 dê ờ huan kơlôi rơcang ir. Jat hơ̆, jơnau rơcang lài dơ̆ 1 là nam 2022, rài lơh sa dunia đơs lài gơguh lơyài wơl, rài lơh sa Việt Nam bol he dê gơguh kung lơyài, pơgap bơh 6 tus 6,5% den roh bơngă khà priă pơgap bơh 2,8 tus 3,2%. Dilah bè jơnau digơlan gơlik geh do là rài lơh sa dunia mờ gơ dờp niam rlau, gơguh lơh sa niam den tŭ hơ̆ rài lơh sa Việt Nam gơtùi gơguh niam mờ dilah bol he kung gam pơn jat tai ngui tŭ niam bơh ală hiệp địñ kă bro khat gơboh den bol he gơtùi geh khà gơguh lơh sa pơgap bơh 7 tus 7,5% tàm nam 2022 mờ dilah bè hơ̆ den khà roh bơngă khà priă digơlan bơh 3,5 tus 3,8%.

Cau mblàng K’Duẩn