VOV4.K’ho- Mang ngai 07/01, tàm ƀòn dờng Vĩnh Long, càr Vĩnh Long, Mpồl Cau lơh broă sa dà lơgar Việt Nam, Ƀộ Nông nghiệp mờ Phát triển Nông thôn mờ Ủy ƀan Ñân zân càr Vĩnh Long pơgồp bal bơyai lơh dơ̆ sơnđờm mŭt lơh Festival kòi phe Việt Nam dơ̆ V nam 2021 bal mờ bơta tus bal bơh gĭt nđờ rhiang cơldŭ ràng tơlik phan bal mờ ală phan bơna pơnrơ ngan.

Củ tịc Mpồl cau lơh broă sa dà lơgar Việt Nam đơs tàm dơ̆ sơnđờm mŭt lơh Festival

Đơs sơnđờm mŭt lơh, ồng Lương Quốc Đoàn, Ủy viên Đảng dà lơgar, Củ tịc Mpồl Cau lơh broă sa dà lơgar Việt Nam pà gĭt, tơnơ̆ 35 nam lơh jăt gùng dà tam gơl pa, ngan là tơnơ̆ 13 nam lơh jăt Kơrnoăt 26 Pơrjum dơ̆ 7, Ƀan Câp hàñ Đảng dà lơgar khoă X dê bè Lơh broă sa sươn sre, cau lơh broă sa mờ ƀòn lơgar, gah lơh broă sa sươn sre mờ lơh sa ƀòn lơgar bơh lơgar he dê neh lơh geh ală cồng nha pal pơñiờ să ngan.

Festival là tŭ niam nàng ală mpồl lơh sa kă bro in geh tŭ tìp măt yal tơngĭt làm uă phan bơna bơh he dê, jòi cau lơh broă bal, bơtàu tơnguh gah lơh sa mờ măy mok lơh gơlik phan lơh geh bơh sươn sre tàm tiah he ê mờ tàm tiah Ring dà dờng Cửu Long; dong kờl ală mpồl lơh sa kă bro, cau lơh broă sa lơh broă geh cồng nha mờ dong gah phan kòi phe Việt Nam kung bè ală măt kă bro phan lơh geh bơh sươn sre geh yal tơngĭt anih lơh gơlik, tơnguh bơta pràn tàm pơrlòng tàm drà kă bro dunia.

Cau mblàng Lơ Mu K’Yến