VOV4.K’ho- Tơnơ̆ 10 nam lơh ngan, tus tŭ do, hìu bơnhă bi Y Glar mờ bi A Dâu (kòn cau Sơdàng), ơm tàm xã Sa Bình, kơnhoàl Sa Thầy, càr Kon Tum ờ mìng lik  klàs bơh rƀah, mờ neh brồ guh geh rài kis pas gơs đau. Bơh bă ù tam kao su, bùm blàng mờ ròng kơnrồ, ròng ka... pah nam hìu bơnhă bi dê priă lơh geh gĭt nđờ rơhiang tơlak đong.

Deh nam 1993 tàm dùl hìu bơnhă rƀah, geh uă oh mi, den jơh bơsram kấp bàr, bi Y Glar ơm tàm hìu dong kờl mè bèp lơh broă sa. Tus nam 2011, Y Glar bau mờ bi A Dâu mờ geh mè bèp 2 gah ai rlau 1 lồ ù mìr. Rài kis gơtìp uă ngan kal ke. Nam 2014, ùr pơ klau bi geh gơnoar atbồ  tiah do bơto pơlam mờ ai càn priă Ngân hàng Chính sách Xã hội mờ khà priă 30 tơlak đong nàng bơtàu tơnguh lơh sa. Bơh khà priă do, bi tam 1 lồ tờm kao su, mờ blơi 2 nơm kơnrồ me, bơdìh hơ̆ ơpah tai 1 lồ ù nàng tam bùm blàng.

Tryang tryồng ngan lơh, kơnờm ngui di broă lơh bơta chài, 1 lồ kao su bơh hìu bơnhă bi dê dờng pràn niam mờ neh lơh geh priă jền. 2 nơm kơnrồ deh geh 3 nơm kòn bè, ùr bơklau bi tăc nàng blơi tai 1 lồ 5 sào ù tam bùm blàng, tam bời lời. Tus tŭ do, hìu bơnhă bi ờ mìng lik klàs rƀah, mờ neh brồ guh geh rài kis pas sơm đau. Bơh bă ù tam kao su, bùm blàng mờ ròng kơn rồ, ròng ka... pah nam hìu bơnhă bi lơh geh 100 tơlak đong. Ờ mìng bè hơ̆ lơm, tŭ tơngai ru, ngai ơm rlô, ùr bơklau bi gam lòt lơh ơpah nàng geh tai priă jền ai hìu bơnhă in. Pa do, hìu bơnhă bi neh lơh geh dùl nơm hìu dờng niam.

Bi A Dâu đơs: tơngai tus, ùr bơklau añ kờp dŭ geh pơn jat tai blơi ù nàng lơh sa mờ càn priă dà lơgar, bal mờ khà priă tềm pềr, tam gơl 1 lồ ù tam bùm blàng tus tam kơphê. Tŭ do, 2  nă ùr bơklau bi dê neh tus bal tàm ală ơdŭ bơto pơlam bơta chài tam mờ sơng ka sền gàr tờm kơphê. Bi A Dâu đơs là: nàng bơtàu tơnguh lơh sa kơ̆ kơl jap lài ngan pal geh ƀồ tơngoh brồ guh lơh pas, bañ kong mờ bơta jơgloh rƀah, geh bơta gĭt wă bè bơta chài, gĭt iăt kơno, bơsram mờ tơrgùm bơta mờng chài. Bơdìh hơ̆, pal sền sơ wì bơta chi tam hơ̆ gơ dờp mờ ù tiah he kờñ tam gơl halà ờ, giá tăc tŭ do mbè lơi.

Ờ mìng gĭt lơh sa jak, bi Y Glar mờ bi A Dâu gam lơh ngan dong kờl ală hìu bơnhă kal ke tàm thôn. Pah nam, lơh geh broă lơh ai bơh 3 tus 4 nă cau in; tŭ lơi kung kờñ tàm pà bal bơta mờng chài, bơto pơlam broă lơh sa ai tơl nă cau in

Đơs bè hìu bơnhă bi Y Glar mờ A Dâu, ồng Nguyễn Minh Thuận, Bí thư Đảng ủy xã Sa Bình, kơnhoàl Sa Thầy, càr Kon Tum pà gĭt,  do là krơh niam hìu bơnhă brồ guh lơh is lik klàs rƀah pơn rơ jak ngan rlau jơh tàm ù tiah do dê. Ờ mìng bè hơ̆ lơm, bi gam jơh nùs ngan tus bal tàm jơh ală srơh lơh broă bơh tiah do dê bơyai lơh bè pà is ù, tă pơgồp ngai lơh gùng lòt bơt bơtàu ƀòn lơgar pa; lơh jat broă bơt bơtàu hìu bơnhă gơguh jak, chờ hờp. Nam 2020, do là dùl tàm ală hìu bơnhă pơn rơ jak geh kấp ủy, gơnoar atbồ tiah do dê jờng rơ, pà khà jờng tàm srơh “Gùt làng bol tam klăc bal bơt bơtàu rài kis niam chài.

Quốc Học ai bơh Băo Kon Tum- Cau mblàng K’Hạnh