VOV4.K’ho - Tàm ală nam do, mờ nùs nhơm lơh ngan lơh niam rlau tai rùp să cau ùr kuang bàng, cau ling tàm tu\ tơngai pa, Mpồl cau ùr Gah đơng lam ling klàng càr Kontum neh lơh pràn srơh “Cau ùr lơh ngan bơsram, lơh broă bơceh pa, geh jơnau bơceh pa” bơh oh mi cau ùr tàm broă  lơh jat ală broă lơh pơr lòng lơh broă, lơh sa geh ngui, drơng geh cồng nha broă lơh mờng chài bơh mpồl dê:

Mpồl cau ùr Gah đơng lam ling klàng càr Kontum geh 42 nă cau tàm mpồl, pơrjum tàm 4 mpồl cau ùr tàm anih lơh broă, di Phòng Tham mưu, Phòng Chính trị, Phòng Hậu cần - kỹ thuật mờ mpồl cau ùr Trung đoàn 990. Nàng srơh “Cau ùr lơh ngan bơsram, lơh broă bơceh pa, bơt bơtàu hìu nhă gơboh gơbài, di mờ mat sơnđan cau ling wa Hồ” lơh geh cồng nha, bal mờ broă bơto bơtê chính trị, nùs nhơm rài kis ai cau tàm mpồl in, Mpồl cau ùr Gah đơng lam ling klàng càr Kontum gam sơlơ bơyai lơh ală broă lơh pơr lòng kờ` tơnguh jơnhua nùs nhơm geh kơnòl, tam klac bal, nhap nhar, bơceh pa bơh oh mi cau ùr dê tàm broă lơh kơnòl ờs mờng.

Nam 2015, Mpồl cau ùr Gah đơng lam ling klàng càr Kontum lam lơh broă lơh “Bal mờ oh tus hìu bơsram”, dờp dong kờl priă bơsram ai 3 nă kơnòm bơsram geh rài kis kal ke tàm xã Ya Xiêr, kơnhoàl Sa Thầy. Pah nam, mpồl dong kờl tơl nă oh là 2 tơlak priă. Bơh bơta sền gròi, lam sồr di tu\, jơh ală oh geh tai nùs nhơm kờ` tus hìu bơsram, lơh ngan gơ gơs là kòn gơ lòng sồr, kơnòm bơsram jak. Đơs bè broă lơh “Bal mờ oh tus hìu bơsram” bơh Mpồl cau ùr Gah đơng lam ling klàng càr Kontum dê, bi ùr Y Núi, Chủ tịch Mpồl tam klac cau ùr xã Ya Xiêr, kơnhoàl Sa Thầy pà git: “Ală sau tàm do den geh rài kis kal ke ngan, mờ ală oh mi cau ùr dong kờl bulah dùl êt halà uă den kung pơn jờng ală sau lơh ngan sơr lèt gan kal ke nàng bơsram jak. Bơh tu\ ală oh mi cau ùr sền gròi, dong kờl, den ală sau geh nùs nhơm sơr lèt gan nàng brồ guh bơsram sră jak rlau.”

Bơh broă lơh kơnòl ờs mờng, uă jơnau bơceh pa, jơnau bơceh niam bơh oh mi cau ùr Gah đơng lam ling klàng càr Kontum geh lơh ngan ngồn gơs ală broă lơh pơr lòng tàm mpồl lơh broă tơn. Pơn yơu bè broă lơh “Nai tap kloh niam” bơh mpồl cau ùr Trung đoàn 990 dê. Jat jơnau sồr bơh Bộ Quốc phòng dê, dùl poh, phan sa bơh tơl nă cau ling dê sùm pal geh bơh 4 tus 5 nai tap. Nàng gàr tơl phan sa kloh niam tàm pah dơ\ sàu sa, mpồl cau ùr Trung đoàn 990 jòi tus ală trang trại ròng phan geh bơngă pin dờn tàm kơn hoàl Đak Tô blơi tap mờ khà uă ngan, bal mờ khà priă lơyah rlau mờ khà priă tac tàm drà kă bro bơh 10 tus 15%. Bơh nam 2016 tus tu\ do, rlau 70 rbô nai tap kloh niam neh geh blơi tàm hìu [ềp tru\ sa bơh mpồl ling dê, tềm pềr geh mờr 20 tơlak priă, jơh khà priă do geh ngui nàng tă pơ gồp tàm kes priă Mpồl dê. Bal mờ hơ\, mpồl cau ùr gam tơnguh broă lơh sa, ròng tai iar, ơda mờ kờp jơh mpồl iar ơda geh rlau 250 nơm, kờ` rơcang phan sa ai kuang bàng, cau ling tàm mpồl in. Trung tá Phùng Trung Văn, Chính uỷ Trung đoàn 990 pà git: “Mpồl cau ùr neh pơgồp dùl bơngă kuơ màng ngan tàm broă lơh mpồl ling dê. Ală oh mi cau ùr neh geh ală jơnau bơceh lơh geh cồng nha ngan, pơn yơu bè broă lơh suơn biap bơh mpồl cau ùr dê, h alà suơn chi sa plai bơh mpồl cau ùr dê kung bè broă ală oh mi cau ùr blơi tap tàm hìu [ềp tru\ sa nàng bơh priă tềm pềr blơi tap, tă pơgồp tàm kes priă bơh mpồl cau ùr Trung đoàn dê kung bè Mpồl cau ùr bơh Gah đơng lam ling klàng càr dê. Tu\ mpồl cau ùr geh jơnau bơceh lơh bè hơ\, den Đảng ủy, Mpồl đơng lam Trung đoàn dong kờl mờ ai tơl bơta [uơn nàng ală oh mi cau ùr in lơh broă.”

Nàng pơn jờng, lam sồr kuang bàng, cau tàm mpồl cau ùr tơnguh jơnhua nùs nhơm tềm pềr, lơh ngan tus bal sền gàr tiah ơm kis, sền gàr dơp ndơl ling klàng, Mpồl cau ùr Gah đơng lam ling klàng càr Kontum rơcang lài bơt bơtàu, lơh broă lơh “Mpồl cau ùr khòm sră sang, phan sang”. Jat tơngai pơr gon, tàm ngai dơ\ 6 pah poh, Mpồl cau ùr lòt khòm sră, phan sang bơh ală mpồl cau ùr pơyua tus. Jơh ală sră sang ndrờm geh mai\ dềt lài mờ tu\ tac. Mờ broă lơh do, Mpồl neh khòm geh rlau 10 tấn sră, phan sang tac geh mờr 35 tơlak priă. Là cau lơh broă văn thư, lơh ngan tus bal broă lơh, đơs bè broă lơh ngềt ngơt mơya geh kuơ, Trung uý Nguyễn Thị Trinh, lơh broă tàm Phòng Tham mưu pà git: “Tàm tu\ lơh broă mờng chài he dê, să tờm sùm bal mờ oh mi cau ùr tàm mpồl lòt khòm tơr gùm sră nggal gam wơl. Lơh niam mờ broă chu. Geh Kuang atbồ Gah đơng lam ling klàng dong kờl nàng oh mi cau ùr bơt bơtàu rơndap broă lơh là khòm sră sang nàng lài ngan là lơh bè lơi gàr niam bơta tiah ơm kis. Dơ\ 2 là rơcang sơndră hoàc huơr mờ tac geh priă, priă do lài ngan là oh mi cau ùr dong ală cau geh rài kis kal ke, pơn yơu lòt còp cau kòp jê hơ\sồng ală sau tiah sar lơgar ngài.”

Brồ guh cồng nha lơh geh, Mpồl cau ùr Gah đơng lam ling klàng càr Kontum gam pơn jat tai lơh broă lơh “Hìu nhă cau ling ùr lam lài”, rơwah lơh lài tàm Mpồl cau ùr Trung đoàn 990. Thiếu tá Nguyễn Thị Lương, Chủ tịch Mpồl cau ùr Gah đơng lam ling klàng càr Kontum pà git: Cồng nha dờng ngan rlau jơh mpồl dê là tu\ lam lơh ală srơh, broă lơh, jơh ală oh mi cau ùr ndrờm jơh nùs tus bal. Bơh ală broă lơh ngan ngồn, neh bơt bơtàu oh mi cau ùr in nùs nhơm, git wă geh kơnòl tàm broă lơh kơnòl ờs mờng mờ gơwèt mờ mpồl bơtiàn. Bè rơndap lơh broă mpồl dê tàm tơngai tus, Thiếu tá Nguyễn Thị Lương pà git: “Tơngai tus, Mpồl cau ùr geh pơnjat tai cribơyai mờ Kuang atbồ Gah đơng lam ling klàng càr, lam lơh geh cồng nha ală srơh, ală dơ\ lam sồr bơh Mpồl cau ùr ală kơnă bơyai lơh. Bol a` kung pơn jờng, lam sồr kuang bàng, cau tàm mpồl bơsram, kơlôi sơnơng, lơh pràn bơceh pa tàm broă lơh kơnòl broă. Kuơ màng rlau tai, bol a` pơn jat tai bơt bơtàu mờ rề ơnàng ală cau geh pơn rơ jak, hơ\sồng ală broă lơh niam, broă lơh pa nàng pơn jat tai lơh jơh niam kơnòl broă chính trị geh jàu.”

Cồng nha bơh srơh “Cau ùr lơh ngan bơsram, lơh broă bơceh pa, bơt bơtàu hìu nhă gơboh gơbài, di mờ mat sơnđan cau ling wa Hồ” bơh oh mi Mpồl cau ùr Gah đơng lam ling klàng càr Kontum lam lơh tàm ală nam do neh lơh niam rlau tai rùp să cau ùr kuang bàng, cau ling tàm tu\ tơngai pa.

              Cau cih mờ yal tơnggit K’Duẩn