VVOV4.K’ho - Tiah prăp gàr phan geh is Ea Sô tàm kơnhoàl Ea Kar, càr Dăk Lăk là tiah geh uă phan brê geh kuơ sùm geh tàm bơta gơtìp cau blơ̆ jòi tơl bơta nàng kơl kơñao. Den tàng, mpồl sền gàr brê tàm tiah do gơtìp uă ngan kal ke tàm broă sền gròi, kơrian ală dơ̆ pơ̆t dă, ting cuh, kơl chi geh kuơ.

Tiah prăp gàr phan geh is Ea Sô tàm kơnhoàl Ea Kar, càr Dăk Lăk geh bă ù ơnàng 27 rơbô lồ, rềp mờ bàr càr Gia Lai mờ Phú Yên. Do là tiah prăp gàr gam geh uă phan jơi 4 nơm jơng geh tàm pang sră pơrhê lơgar Việt Nam dê mờ uă bơta chi geh kuơ bè: Chi Trắc, kơmlài, giáng hương, kơl te... Kung tài bè hơ̆ den tàng uă nam do, Tiah prăp gàr phan geh is Ea Sô là tiah geh uă cau tìs mờ adăt sền gàr brê.

                                        Mpồl sền gàr brê Ea Sô tàm gùng lòt sền gròi

Neh lơh broă tàm tiah Prăp gàr phan geh is Ea Sô bơh tàm tŭ pa geh crơng gơs, ồng Trần Kim Châu, lơh broă tàm anih sền gàr brê sồ 8 pà git, anih sền gàr geh 5 nă cau atbồ, sền gàr mờr 4 rơbô lồ brê, tàm hơ̆ geh tiah brê rềp mờ càr Gia Lai. Bè ờs tàm kàl prang, tàm hơ̆ uă ngan là tàm lồi nam den bơta tìs mờ bơh làng bol kis rềp gùt dar brê prăp gàr gơguh. Ală làng bol sùm jòi tơl bơta nàng mŭt tàm brê ting cuh phan brê, kơl chi brê geh kuơ nàng tăc mờ ală cau tus blơi in. “Cau geh tơn tàm brê là kal ke ngan tŭ lòt lơh broă ờ kời trồ ngai kung bè trồ mang. Tŭ lòt sền gròi tìp tàm tiah kơl chi brê pal pal ơm krăo 2, 3 ngai tơn tàm brê, bơta ngòt tam dră mờ cau blơ̆ kơl kơñao chi brê, ting cuh phan brê gơtìp tơn. Bŭ lah kal ke, priă nhai ờ uă, mơya oh mi lơh broă tàm do geh lơh ngan, di lah ờ lơh ngan den ờ tŭ lơi geh ơm tàm do jŏ jòng”.

                               Tŭ ơm rơlô să bơh cau sền gàr brê tàm gùng lòt sền gròi

Tàm anih sền gròi brê sồ 4, mpồl atbồ, sền gàr rơlao 3 rơbô lồ brê, cau blơ̆ kơñao kơl chi brê sùm mŭt tàm brê mờ gùng ù gờl, gùng dà dờng nàng kơl chi brê. Ồng Nguyễn Trung Dũng, Phó kuang atbồ anih sền gàr brê sồ 4 pà git: Tŭ do sóng điện thoại geh tàm gùt tiah, den tàng cau blơ̆ sùm geh ai cau sền gròi tàm ală anih sền gàr brê, tŭ gŏ mpồl sền gàr brê bơyai lơh lòt sền gròi den cau hòi điện thoại yal lài, lơh broă atbồ, sền gàr brê bơh ală cau lơh broă tàm do gơtìp kal ke uă ngan. “Broă sền gàr brê bơh bol añ den tìp uă ngan kal ke, ù tiah kơh, croh dà, dà dờng geh uă, cau blơ̆ tàm do khin ngan. Cau blơ̆ sùm ai cau sền gròi anih bol añ lơh broă, sền gròi nàng git geh nđờ nă cau nàng sơgràm tŭ trồ tiah mìu, bol añ lòt sền gròi ờ thàn den cau mŭt kơl. Geh ngai bol añ lời rơndeh, ai gal cau, pờ đèng lơh bè pơrlồm lòt krăo nàng kŭp. Bol añ lơh ngan nàng lơh gơs jăk chài ală kơnòl”.

                                   Sào mang tàm brê bơh ală cau sền gàr brê dê

Jăt ồng Lê Minh Tiến, Kuang atbồ Tiah prăp gàr phan geh is Ea Sô yal, nam 2021, mpồl sền gàr brê tàm tiah prăp gàr neh gŏ, lơh glài 23 dơ̆ tìs mờ 30 nă cau, tàm hơ̆ jào Mpồl sền gàr brê Ea Kar 17 dơ̆ mờ 24 nă cau nàng lơh glài di jăt mờ kơrnoăt tàm adăt boh lam dê. “Tàm tiah rềp nhàr bal mờ bàr càr den khà làng bol kis tàm tiah jăt gah brê gal ngan, rơlao 20 rơbô nă. Rài kis làng bol tàm do gơtìp kal ke ngan, pơgồp bal mờ tơngai do gơtìp kòp Kovid-19, den sơlơ lơh rài kis làng bol sơlơ kal ke rơlao. Broă làng bol lòt jòi phan sa tàm brê, bơh tŭ hơ̆ lơh gơtìp aniai tus mờ phan geh is brê bơh mpồl sền gàr uă ngan. Dơ̆ bàr bè mpồl sền gàr brê ờ gal. Tiah prăp gàr brê neh gơtìp uă ngan cau, oh mi neh gơtìp ală cau blơ̆ cuh, srơ̆p di tềng să, mơya tơnơ̆ do ờ geh broă dong kờl lơi sơl. Neh geh uă ngan oh mi kung kờñ tam gơl anih lơh broă, dan ơm ờ lơh broă. Kung kơ̆p kờñ ală kấp, gah lơh broă geh gơnoar sền nàng gờñ geh ală broă lơh niam wơl kơ cế di pal”.

Tàm tiah prăp gàr phan geh is Ea Sô, broă atbồ, sền gàr brê bơh mpồl cau tàm do tơn tŭ do kung gam gơtìp uă kal ke. Geh ờ uă kuang bàng gàr brê neh gơtìp tìs mờ pal tơm wơl ală hoàc huơr tŭ lơh broă bal mờ mpồl cau blơ̆. Mơya mờ nùs nhơm kờñ gơboh mờ brê bơnơm, 70 nă kuang bàng, cau lơh broă tàm Tiah prăp gàr phan geh is Ea Sô gam ngai pah ngai sền gròi, lơh ngan sơrlèt mờ ală kal ke nàng sền gàr brê Ea Sô geh niam.

Cau cih Tuấn Anh-Cau mblàng Ndong Brawl