VOV4.K’ho - Pơn jăt tai pơrjum dơ\ 9, Quốc hội khoă 14, mho òr (25/5), ală kuang bàng cri bơyai tơn tàm internet bè Nghị quyết ờ tă dia ngui ù lơh sa suơn sre, ring bal uă mờ broă gờ` ngui Nghị quyết, ală kuang bàng Quốc hội đơs là, tàm broă lơh jăt pal gàr niam nùs nhơm lơh làng, ring bal, ba` lời gời ù kờ` chồl pràn broă lơh jăt gùng dà broă lơh bơh Đảng, Dà lơgar bè broă tơnguh bơtàu lơh sa suơn sre.

Ală kuang bàng ring bal jơnau kơlôi, broă pơn jăt tai ờ tă dia ngui ù lơh sa suơn sre tus nam 2025 ờ geh lơh tơmù tă dia kes priă dà lơgar tài do là broă lơh gam geh lơh tàm mùl màl.

Mờ khà tă dia ngui ù lơh sa suơn sre geh ờ tă di pơgăp 7 rơbô 500 tơmàn đong tàm 1 nam geh pơn jăt tai là broă dong kờl tơn ai mpồl lơh broă, cau dùl nă să lơh sa suơn sre in.

Bal mờ broă pơn jăt tai tơnjo\ tơngai ờ tă dia ngui ù lơh sa suơn sre tus nam 2025, kuang bàng dan Chính phủ pal geh ală broă lơh niam kờ` tơrgùm ù sre, ai phan lơh broă kuơ màng do mu\t tàm tê di cau tơl pràn ngui ù geh cồng nha ngan.

Cau mblàng Ndong Brawl