VOV4.K’ho- Tài gơ rềng bơh mìu càl rbut dờng sồ 5 tàm bồ nhai 9 pa do, tàm kơnhoàl M’Drăk, càr Dăk Lăk gơlik geh bơta chi brê pă, gơ pừ di tàm gùng che đèng 22KV, lơh chơt đèng tàm uă tiah tàm ală kơnhoàl Ea Kar mờ M’Drăk. Jat gah lơh ồs đèng càr pà git, mờ rlau 750 kơi sồ gùng che đèng trung thế lòt gan uă bă brê tam, tàm tơngai mìu càl rbut dờng, jơnau pơhìn chi brê pă pừ, lơh gơbàn bơta ờ niam bè ồs đèng là dờng ngan. Gah ồs đèng kơp kờñ cau tam brê pal lơh jat, pơgồp bal niam rlau tai nàng gàr ờdo ờdă gùng che đèng, pleh ngòt rơngơt tus màng kis mờ phan bơna.

Tàm nggùl nhai 9, bi Vương Văn Hoàn, ơm tàm thôn 7, xã Cư San sơn đờm tơnhàu rlau 4 lồ keo sơntìl pa. Bi pà git, tài brê keo geh gùng che đèng cao thế lòt gan, den tàng lài mờ tŭ tơnhàu, hìu bơnhă bi pal yal mờ kuang bàng, cau lơh broă gah ồs đèng tus pơlam kơl chi gàr ờdo ờdă: “Tàm mìr den mìng tam tờm keo sơntìl pa lơm. Bơh sơn rờp den tam kung rềp gùng che ồs đèng. Tơnơ̆ do kơno mblàng yal bơh gah ồs đèng dê den bol hi kung git is là pal pès wàs chi rŭ rơm gùt gar gùng che đèng nàng gàr niam màng kis hìu bơnhă dê in”.

Tơl lồ keo sơntìl pa lơh geh priă jền bơh 60 tú 80 tơlak đông, là bơnah lơh gơlik priă jền tờm ngan bơh làng bol Cư San, kơnhoàl M’Drăk dê

Jat ồng Thào Seo Lử, Kuang atbồ thôn 7, xã Cư San đơs, tàm tiah sar lơgar ngài ơm ngài mờ tiah tờm kơnhoàl rlau 50 kơi sồ, geh ngui gùng che ồs đèng dà lơgar là bơta chờ hờp dờng ngan bơh làng bol dê. Bè hơ̆ den tàng broă gàr ờdo ờdă ai gùng che đèng lòt gan in kung là kơnòm bơh làng bol dê: “Bơh nam 2007 geh doĭ đèng crap lơh trạm rê ndo den làng bol chờ hờp ngan, ưn ngài ngan Đảng, dà lơgar mờ gah ồs đèng. Rài kis lơh sa bol hi dê tàm do uă ngan là kơnờm tàm broă tam brê keo. Tàm kàl mìu nhàc càl rbut dờng den añ kung tơngkah sùm mờ làng bol là bañ sền sơp, dilah ờ den chi che gơ pừ di tàm gùng che đèng lơh gơ rềng tus màng kis bơh làng bol dê.

Jơh gùt xã Cư San geh 4 rbô 800 hìu bơnhă làng bol, jơh ală là kòn cau Mông mờ kòn cau Dao bơh ală càr tiah đah tô dà lơgar mut ơm kis. Ồng Phạm Đăng Đảng, Chủ tịch Ủy ban Nhân dân xã Cư San pà git, ù tiah ơnàng mơya kơh bơnơm, ro kơnrañ den tàng broă lơh sa bơh brê là bơnah lơh geh priă jền tờm ngan, di mờ mờng quèng lơh broă sa bơh làng bol jơi bơtiàn kòn cau dùl êt nă cau dê. Tam brê keo ờ roh uă tŭ tơngai halà ơpah cau sơngka sền gàr, mìng kờñ tă priă blơi sơntìl bơh sơn rờp. Tơnơ̆ bơh 4 tus 5 nam, kờp bal tơl lồ keo tơnhàu ai priă jền bơh 60 tus 80 tơlak đông. Den tàng, tŭ tam keo, làng bol ngui tơl bă ù, geh tŭ tam tờm chi tàm tiah rềp gùng che đèng cao áp: “Tàm tơngai do den gah ồs đèng mờ xã neh pơgồp bal niam ngan tàm broă mblàng yal, lam sồr làng bol, bulah bè hơ̆ kung gam 2, 3 tiah den ờ hềt gơtùi lam lơh niam jat jơnau sồr tơl khà bơh gah ồs đèng dê. Tài dilah lam lơh bè hơ̆ den bă ù làng bol dê gơtìp ai uă ngan. Den gơnoar atbồ xã bal mờ gah ồs đèng pơn jat tai mblàng yal, lam sồr làng bol, nàng lơh bè lơi gơ in ring niam jơh bal bè broă lơh sa bơh làng bol dê mờ ờdo ờdă gùng che ồs đèng”.

Jơnau pơhìn tờm keo sơntìl pa pă, pừ tàm tiah rềp gùng che đèng 22KV tàm Cư San

Ồng Nguyễn Công Hướng, Phó Kuang atbồ ồs đèng Ea Kar pà git, jat jơnau sồr, den làng bol geh gơnoar tam chi ngài mờ gùng che đèng trung áp êt ngan rlau jơh là 3 thơk. Mơya, tài tờm keo sơntìl pa digơlan jơnhua tus 15 thơk, pơhìn pă gơ pừ tàm gùng che đèng, den tàng pal tam ngài mờ gùng che đèng 20 thơk hơ̆ sồng gơtùi gàr niam ờdo ờdă. Tŭ do, ồs đèng Ea Kar gam atbồ, ai ngui rlau 750 kơi sồ gùng che đèng trung áp lòt gan jơh 2 kơnhoàl Ea Kar mờ M’Drăk, uă ngan là lòt gan ală tiah kơh bơnơm geh brê tam. Tàm tơngai mìu càl rbut dờng, pơhìn gơlik geh broă ờ niam tus gùng che đèng tài bơh chi brê pă gơpừ tàm gùng che đèng.

Ngai 11/9 pa do, tài gơ rềng bơh càl rbut dờng sồ 5, mìu sơr bal mờ càl pồt pràn neh lơh tơrlah ù, chi brê pă, gơ pừ lơh tac gùng che đèng 22KV gơ wèt gùng che đèng  471F18 đah Ea Kar mờ M’Drắk, lơh chơt đèng tus 11 rbô 600 hìu bơnhă cau ngui đèng. Ală anih gơlik geh broă do tàm ală tiah kơh bơnơm jơnhua, lơh gơbàn kal ke ai broă lơh niam wơl in. Den tàng, nàng gàr niam ờdo ờdă ai gùng che đèng in tàm tơngai mìu nhàc, gah ồs đèng kờñ ngan geh bơta pơgồp bal bơh làng bol dê: “Mờ bơta krơi is gùng che đèng lòt gan uă tiah brê tam là bơta kal ke dờng ngan gơ wèt tus mờ bol hi tàm broă lơh ai ngui ồs đèng. Den tàm tơngai tus, ồs đèng Ea Kar pơn jat tai geh uă broă lơh bal, bè pơn jat tai pơgồp bal mờ gơnoar atbồ ƀòn lơgar mblàng yal nàng làng bol in git mờ ring bal mờ gah ồs đèng, pơgồp bal niam rlau tai mờ gah ồs đèng nàng gàr tiah kềng gah gùng che đèng geh ờdo ờdă kung bè tàm broă ngui đèng ờdo ờdă, kuơmàng là tàm tơngai mìu càl rbut dờng”.

Cau lơh broă gah ố đèng lơh niam wơl broă chi brê pă, pừ tàm gùng che đèng tàm M’Drăk ngai 12/9

Ồs đèng geh gơtha kuơmàng ngan tàm  broă drơng bơtàu tơnguh lơh sa mpồl bơtiàn in. Den tàng, làng bol pal lơh jat di jơnau sồr gàr ờdo ờdă tiah rềp gùng che đèng, ờ mìng là sền gàr màng kis bơh să tờm mờ hìu bơnhă dê in, mờ gam pơgồp bơnah gàr sùm ồs đèng drơng ai rài kis mờ broă lơh sa in.

Cau mblàng K’Duẩn