VOV4.K’ho - “GDP nam 2021 geh 2,58% là geh cồng nha uă; Nghị quyết sồ 128 mùl màl dong kờl brồ guh lơh sa, chồl pràn drà kă bro; Priă bơcri lơgar bơdìh gơguh; Chứng khoán tơnguh bơtàu pràn kơl dang; Khà priă ngui sa gơguh ờ uă ngan bơh nam 2016; Kă bro phan mờ lơgar ndai pơn jăt tai là bơta pràn gơguh lơh sa”...

Ală jơnau yal do pa geh Tổng Kụk Thống kê gơwèt Ƀộ Kế hoạch mờ Đầu tư yal tàm dơ̆ tìp mờ ala măt ală anih lơh broă yal tơngit sră ƀăo, Yal khà kờp bè broă lơh sa mpồl bơtiàn tàm Quý 4 mờ gùt nam 2021. Bơdìh hơ̆ tai, broă lơh sa mpồl bơtiàn nam 2021 geh ờ uă jơnau yal pal kah ngan bè: mờr 160 rơbô mpồl lơh sa kă bro mŭt mờ mŭt tai tàm drà kă bro- gơmù jăt mờ nam 2020; broă gơmù khà priă gơguh 0,81%. Geh 2 gah geh khà gơguh lơh gơmù uă là nhơl chờ mờ khà năc dunia tus lơgar Việt Nam gơmù tus mờr 96%.

Jơnau yal bơh Tổng Kụk thống kê dê ai gŏ, nam 2021, kờp jơh priă lơh geh bơh tac mờ blơi phan bơh lơgar ndai geh rlau 668 tơmàn 500 tơlak dolar Mỹ, tàm hơ̆ priă lơh geh bơh tac phan hờ lơgar ndai geh 336 tơmàn 250 tơlak dolar Mỹ, gơguh 19% pơndrờm mờ nam 2020. Pal sền gròi là tàm nam 2021, geh 35 bơta phan lơh geh priă jền bơh tac hờ lơgar ndai rlau 1 tơmàn dolar Mỹ, geh 93,8% tàm kờp jơh priă geh bơh tac phan hờ lơgar ndai, tàm hơ̆ geh 8 bơta phan tac hờ lơgar ndai geh rlau 10 tơmàn dolar Mỹ, geh 69,7%. Nam 2021 sền gŏ bơta ndrờm bal đah tac mờ blơi phan bơh lơgar ndai pơn jat tai tac uă phan hờ lơgar ndai, geh 4 tơmàn dolar Mỹ, lơh tềl nam dơ̆ 6 pơn jat sùm Việt Nam tac uă phan hờ lơgar ndai tàm tŭ tơngai broă kă bro gùt plai ù kong gơ rềng kơn jơ̆ ngan, ờ hềt geh bơh lài tus tŭ do tài bơh kòp Kovid-19. Cồng nha gơguh bơh tac phan hờ lơgar ndai nam 2021 dê là bơta niam tàm bơtàu tơnguh lơh sa dà lơgar.

Cau mblàng Ndong Brawl- K’ Duẩn