VOV4.K’ho- Mang 21/6, Anih sền gròi kòp tê jê să (CDC) càr Gia Lai yal, tiah do pa geh tai 1 nă cau bơtờp kòp Covid-19 rê bơh dùl tiah lơh sa mờ măy mok tàm Bình Dương. Ngan ngồn cau do là cau klau bơtờp kòp Covid-19 deh nam 1995 là công nhân lơh broă tàm công ty ơn bung mi tàm kơldung tàm ƀòn dờng Thủ Dầu Một (Bình Dương). Cau do ơm tàm tiah hìu ơm ơpah tàm sơnah ƀòn Nghĩa Hội (thị xã Tân Uyên, càr Bình Dương) mờ rê tàm thôn Yon Tok, xã Ia Glai, kơnhoàl Chư Sê tàm drim ngai 19/6. Mho dùl ngai bal, cau do tus Hìu sơnơm xã yal tiah lòt rê mờ geh ai mẫu xét nghiệm kòp Covid-19 tài bơh rê bơh tiah geh pơhìn bơtờp kòp uă. Tŭ do, 24 nă cau là F1 bơh cau kòp do neh geh ai ơm yah ngài jat jơnau sồr. Tŭ do, cau kòp ờ hềt geh tềl tơngŏ bơta kòp bè bơsiă, kòp duh să mờ gam geh ai ơm yah ngài tơrgùm bal.

UBND càr Gia Lai geh sră nggal sồr ală tiah tàm càr pơn jat tai lơh kràñ broă atbồ cau bơh tiah kòp rê tàm ƀòn, sơlơ tơnguh broă lơh lòt sền, sền gròi tàm ală gơl gùng, gơl gùng mut tàm càr.

Cau mblàng K’Hạnh