VOV4.K’ho- Tàm qúy I, nam 2021 do, mpồl lòt sền gùng lòt càr Gia Lai neh gŏ mờ lơh glài gĭt nđờ jơ̆t mpồl cau, cau dùl nă să is lơh tìs ală jơnau sồr bè gùng lòt, pơndiang phan bal mờ kờp jơh priă lơh glài rlau 300 tơlak đong. Mùl màl, tàm broă lơh lòt sền, lơh glài lơh tìs bè rơndăp tăp sèng ờdo ờdă gùng lòt, mpồl lòt sền bơh Sở Giao thông, Vận tải càr Gia Lai dê neh lam lòt sền 160 dơ̆ rơndeh, lơh glài mờ priă 22 mpồl cau, 40 nă cau dùl nă să is bal mờ kờp jơh priă lơh glài 209 tơlak đong, kŭp sră măy rơndeh geh tơngai pơrgon gơwèt mờ 9 nă cau, kŭp 13 sră pal geh gơwèt mờ rơndeh pơndiang phan pơndiang năc, sồr tơrmù phan pơndiang kơn jơ̆ 38 tấn 6 tạ phan kă bro.

Tàm 3 nhai nam do, mpồl lùp sền gùng lòt Gia Lai lơh glài rlau 300 tơlak đong tài bơh ală broă lơh tìs tàm gah gùng lòt, pơndiang phan, pơndiang năc

Ală tìs uă ngan là pơndiang phan kơn jơ̆ rlau ir mờ bơta ai, pơndiang jơnhoa rlau is mờ jơnau ai, pơndiang phan sơrlèt hờ đăp, ờ geh sră pal geh ai gơnoar pơndiang phan pơndiang năc jăt jơnau sồr, lòt mŭt tàm gùng kơryan...Gơwèt mờ gah broă lơh rơndeh pơndiang năc, geh 20 tàm 46 nơm rơndeh gơtìp sền geh lơh tìs, bal mờ kờp jơh priă lơh glài mờr 100 tơlak đong. Kuơmàng, tàm dơ̆ sa tềp bơhiàn dà lơgar Tân Sửu 2021, mpồl lòt sền gùng lòt neh dờp mờ bơsong 121 jơnau yal bơh năc đì rơndeh dê yal bè broă ờ tam gơl, ờ tơm wơl vĕ tŭ ờ lòt tai tài bơh gơrềng bơh kòp Covid-19 dê tàm càr.

Cau mblàng Lơ Mu K’Yến