VOV4.K’ho- Kờp tus lồi nhai 10 nam do, tàm càr Gia Lai geh rlau 42 rbô 600 nă cau lơh broă bơh ală càr, ƀòn dờng tiah đah jum dà lơgar rê pleh kòp Covid-19. Càr Gia Lai gam tơrgùm jòi broă lơh ai khà cau lơh broă do in, nàng kờñ lơh niam broă lơh sền gàr ờdo ờdă rài kis mpồl bơtiàn tàm bơta kòp bơtờp.

Mŭt tàm kàl tơnhàu kơphe, cau lơh broă geh ai geh broă lơh

Tàm nhai 10 nam do, Sở Lao động, Thương binh mờ Xã hội càr Gia Lai neh lơh broă mờ ală càr: Bình Dương, Đồng Nai, ƀòn dờng Hồ Chí Minh nàng lùp kờñ gĭt jơnau kờñ rwah cau lơh broă mờ bơta dong kờl bơh mpồl lơh sa kă bro dê; mblàng yal, hòi jà, geh broă rơndăp lơh ai 4 rbô 200 nă cau lơh broă in wơl lòt lơh broă wơl; Anih tờm Jòi broă lơh càr Gia Lai kung neh bơyai lơh uă dơ̆ ràng tơlik broă lơh tàm ală kơnhoàl, thị xã, ƀòn dờng, jòi geh broă lơh ai gĭt nđờ rhiang nă cau lơh broă in. Tŭ do, càr sơnđờm mŭt tàm kàl tơnhàu kơphe mờ kau su, gĭt nđờ rbô nă cau lơh broă là làng bol jơi bơtiàn kòn cau dùl êt nă cau kung geh ai geh broă lơh sơl.

Cau mblàng Lơ Mu K’Yến