VOV4.K’ho– Kơnờm geh gùng dà pơn jờng bơtàu tơnguh đèng mat tơngai jat kơrnuat sồ 13 nam 2020 bơh Thủ tướng Chính phủ dê, mìng tàm 1 nam, bơnah đèng bơtơl bơh càr Gia Lai dê gơguh rlau 600 MWP. Gia Lai sền do là cồng nha pal cih dờp ngan bè broă mpồl bơtiàn tă pơgồp ai broă bơcri priă năng lượng tàm tiah do. Bulah bè hơ̆, tă pơgồp tàm cồng nha do, neh geh uă cau dùl nă să, mpồl lơh sa kă bro neh bơcrh ală rơndap broă lơh trang trại ờ ngan, anih prap phan, hìu măi lơh broă kờñ lơh gơlik đèng mat tơngai, tac mờ khà priă là 1 rbô 943 đông tàm 1 kWh tàm 10 nam jat Kơrnuat sồ 13 nam 2020.

Bulah neh geh tơrbŏ mờ bơh jŏ neh dờp khà priă blơi dong kờl ngui ai broă lơh đèng mat tơngai lơh hơđang rơkàng hìu in jat Kơrnuat sồ 13 tơlik ngai 6/4/2020 bơh Thủ tướng Chính phủ dê, mơya nggùl nhai 3 nam 2021, tềng hơđơm ală anih lơh đèng mat tơngai tàm ƀòn Kte, xã Hbông, kơnhoàl Chư Sê, càr Gia Lai kung mìng là nhơt hòn lềng lơm. Bal mờ nhơt, hơđang mat ù là ală ñjrong lòs geh sơn tơp nàng đơ rơkàng hìu mờ git nđờ rhiang pang pil pờ tơlik ồs đèng hơđang. Cau geh ơpah gròi sền tàm do pà git, bơh tŭ geh lơh mờ tơrbŏ tus tŭ do, ù do kung gam tĕ gời, ờ hềt geh tŭ tam halà ròng khat dùl bơta phan lơi.

Mùl màl ờ geh broă lơh sa, mơya kung gam lơh sră nggal mờ lơh broă lơh nàng geh dờp khà priă dong kờl ngui ai đèng mat tơngai lơh hơđang rơkàng hìu in jat kơrnuat sồ 13 bơh Thủ tướng Chính phủ dê gam là bơta geh ngan bal bơh uă ngan ală rơndap broă tàm jơh ală kơnhoàl Chư Sê, Chư Pưh, Chư Prông, Đức Cơ, Phú Thiện, càr Gia Lai.

Hơđơm broă lơh đèng mat tơngai hơđang rơkàng hìu geh cih mat lơh trang traị tàm xã Hbông, kơnhoàl Chư Sê

Ồng Hồ Minh Hậu, kuang atbồ cơldŭ lơh sa phan bơna kơnhoàl Chư Sê pà git, nggùl nam 2020, tŭ mìng rơp pa geh 13 rơndap broă geh lơh tàm kơnhoàl, cơldŭ neh crơng gơs mpồl sền sơ wì broă lơh ngan ngồn bơh ală rơndap broă lơh đèng mat tơngai dê. Broă sền sơ wì pa geh lơh nggùl tŭ tơngai den gơtìp sồr ơm wơl. Ồng Hậu pà git, 5 tàm 7 rơndap broă neh geh sền sơ wì ndrờm geh sră nggal là broă lơh trang trại halà rơndap broă lơh sa suơn sre công nghệ cao. Bulah bè hơ̆, mùl màl broă lơh sa mìng là pơrlồm lơm, ờ geh ngan, lơh đèng hơ̆ sồng geh ngan: “Sền sră nggal mờ geh trang trại bơsềt, tờm chi lơh sơnơm den ngan là geh đèng mat tơngai lơh hơđang rơkàng hìu lơm. Sền sơ wì geh tam đinh lăng, mơya mìng tam gơ in geh gời, pơn yơu tam bơsềt, mut sền den gŏ 1 nơm hìu geh 3 sèng tam bơsềt, pah sèng lơh yah ngài pơgap 2 thơk. Halà yồng gùt dar ală ñjrong đơng, lơh nàng dră wơl mờ mpồl sền gròi, sền gŏ geh bơh 10 tus 20% rơndap broă, gam wơl là ù sang tĕ gời”.

Dùl rơndap broă lơh đèng mat tơngai hơđang rơkàng hìu tàm xã Ia Blang, kơnhoàl Chư Sê

Dùl nă cau bơceh priă lơh đèng mat tơngai hơđang rơkàng hìu tàm rơndap broă lơh sa suơn sre pà git, kơrnuat sồ 13 nam 2020 bơh Thủ tướng Chính phủ dê geh gùng dà pơn jờng bơtàu tơnguh đèng mat tơngai. Jat gùng dà do, ală rơndap broă lơh đèng mat tơngai hơđang rơkàng hìu geh blơi mờ khà priă jơnhua ngan rlau jơh 8,38 dolarCent Mỹ tàm 1 Kw, ndrờm mờ 1 rbô 943 đong tàm 1 kW, jơnhua rlau mờ ală rơndap broă lơh đèng mat tơngai ndai. Bulah bè hơ̆, jat sră nggal sồ 7088 tơlik ngai 22/9/2020 bè pơlam broă bơcri priă lơh đèng mat tơngai hơđang rơkàng hìu bơh Bộ Công thương dê cih cau geh dờp khà priă tac đèng dong kờl bơh chính phủ dê là ală rơndap broă lơh ồs đèng geh lơh tàm ală broă lơh bơt bơtàu (jat di Adat bơt bơtàu nam 2014) mờ broă lơh do gam ngui di bơta kuơ, jơnau kờñ. Jat cau do đơs, tài bơta kuơ gơ lin khà priă đah ală bơta bơcri priă, den tàng mpồl lơh sa kă bro geh jòi broă nàng blac pơrlồm mờ tam drămờ anih atbồ: “Uă cau tam dră mờ broă mìng ròng 2, 3 nơm iar. Geh mpồl sền sơ wì tus den đơs là iar pa chơt tài bơh kòp lơh aniai. Ai tŭ do kờñ ròng phan lơi den kung pal geh drà kă bro, geh bơcri priă, geh anih blơi. Đơs ngan là mìng pơrlồm lơm, ai tŭ do den lơh jat 100% halà bơsong bơta ngui ù den lơh ờ jai”.

Tŭ do, càr Gia Lai geh 3 rbô 248 broă lơh đèng mat tơngai, kờp jơh bơta pràn là 604 MWp. Tàm hơ̆, geh mờr 400 broă lơh đèng mat tơngai hơđang rơkàng hìu lơh tàm broă lơh công nghiệp, trang trại, lơh sa suơn sre công nghệ cao mờ kờp jơh bơta pràn rlau 400 MWp. Bulah bè hơ̆, tus tŭ do, ală rơndap broă lơh đèng mat tơngai hơđang rơkàng hìu gam geh dờp bơta dong kờl jat kơrnuat sồ 13 bơh Thủ tướng Chính phủ dê, mìng geh ală tiah mờ gah ồs đèng atbồ bè sră nggal. Bal mờ hơ̆, ală mpồl geh gơ rềng ờ hềt geh cơ chế pơgồp bal loh làng.

Ồng Trần Ngọc Phận, Phó Chủ tịch Ủy ban Nhân dân kơnhoàl Đức Cơ pà git: “Nam 2020, kơnhoàl Đức Cơ jat tàm broă rơndap lơh ngui ù ai tam gơl 20 lồ ù lơh sa suơn sre gơs ù lơh sa suơn sre ndai, ring bal gùng dà nàng ală cau bơcri priă in bơcri priă lơh sa suơn sre công nghệ cao tàm bă ù tam gơl. Cau bơcri priă tam tờm chi lơh sơnơm, bơsềt. Broă ai gơnoar kă bro đèng den kơnhoàl ờ ai gơnoar, mờ gơ wèt hờ Kong ti ồs đèng Gia Lai”.

Ală rơndap broă lơh đèng mat tơngai tàm xã Hbông, kơnhoàl Chư Sê

Kơnhoàl đơs nền, mìng ai gơnoar tam gơl jơnau kờñ ngui ù, ai broă lơh gơlik- tac bro đèng là broă bơh mpồl lơh sa kă bro mờ gah ồs đèng dê. Mơya, ồng Võ Ngọc Quý, Phó Kuang atbồ Kong ti ồs đèng Gia Lai pà git, broă sền sơ wì cau tờm rơndap broă geh lam lơh broă lơh sa ngan ngồn halà ờ, broă lơh geh gàr niam jat Adat Bơt bơtàu nam 2014 bè Bộ Công thương sồr halà ờ, ờ gơ wèt kơnòl kong ti dê: “Cau bơcri priă pal lơh broă mờ anih lơh broă geh gơnoar atbồ bè bơt bơtàu nàng sền sơ wì broă lơh bơt bơtàu. Kong ti ồs đèng Gia Lai mìng lam lơh broă sền sơ wì jơnau sồr kỹ thuật gơ wèt tus mờ broă lơh đèng mat tơngai hơđang rơkàng hìu. Tŭ kờñ sền sơ wì lơh ồs đèng den ală cau bơcri priă pal geh ală sră nggal adat boh lam. Gah ồs đèng sền sơ wì tàm sră nggal cau bơcri priă yal, ai sền sơ wì bè broă lơh bơt bơtàu den kong ti ồs đèng ờ geh kơnòl”.

Ồng Phạm Văn Binh, kuang atbồ Sở Công thương càr Gia Lai pà git, Ủy ban Nhân dân càr neh jàu gah công thương in đơng lam lam lơh broă sền sơ wì broă lơh ngan ngồn bơh ală rơndap broă đèng mat tơngai tàm càr. Broă do geh lam lơh tàm lồi nhai 3 mờ nhai 4 nam do.

Cau mblàng K’Duẩn