VOV4.K’ho- Tơnơ̆ tŭ  git gŏ uă cau bơtờp kòp Covid-19 tàm mpồl bơtiàn ờ hềt git loh bơtờp kòp bơh lơi, mho ngai 29/10, Mpồl đơng lam rơcang sơndră kòp Covid-19 ƀòn dờng Pleiku, càr Gia Lai neh geh sră nggal sồr ală tiah, mpồl lơh broă gơ wèt mpồl đơng lam lam lơh jal mhar ală broă lơh rơcang sơndră kòp bơtờp.

Ƀòn dờng Pleiku git gŏ nđờ jơt nă cau bơtờp kòp Covid-19 tàm mpồl bơtiàn

Mpồl đơng lam rơcang sơndră kòp Covid-19 ƀòn dờng Pleiku sồr gah lơh sơnơm sơlơ gròi sền, đal git tiah geh kòp, bơsong mờ tam cah jơh tiah geh kòp pa, xét nghiệm rề ơnàng ală tiah geh jơnau pơhìn bơtờp kòp nàng jòi mờ kơryan jơnau lơh bơtờp kòp, mhar tam cah F0, F1 lik bơh mpồl bơtiàn; sồr làng bol tàm ƀòn dờng Pleiku geh tềl tơnggŏ duh să, bơsiă, kal ke tă nhơm.. den tus mơ hìu sơnơm xã, sơnah ƀòn nàng xét nghiệm mhar kòp Covid-19 ờ sa priă. Mho ngai 29/10, càr Gia Lai git gŏ 66 nă cau bơtờp kòp pa mờ 7 nă cau bơtờp wơl mờ virus Sars CoV-2 lòt bơh tiah geh kòp rê.

Cau mblàng K’Duẩn