VOV4.K’ho- Bơh ngai 27/5 tus tŭ do, tàm càr Gia Lai geh 4 tiah kòp as sồt kơltau tàm rơpu, kơnrồ mờ mờr 70 nơm tàm 3 kơnhoàl Mang Yang, Chư Sê, Đắk Đoa mờ geh bơta pơhìn bơtờp uă tiah.

                                                            Kòp as sồt kơltau tàm Gia Lai

Tŭ do, kờp jơh mpồl phan poan jơng bơh càr Gia Lai dê là rlau 435 rơbô nơm, ơm dơ̆ 2 gùt lơgar; uă ngan là ròng dềt, rah rài, tiah làng bol jơi bơtiàn kòn cau. Broă rcang sơndră kòp, sền gàr ờdo ờdă ai mpồl phan poan jơng in geh kuơ dờng màng tàm broă bơtàu tơnguh lơh sa bơh làng bol dê. Den tàng, UBND càr Gia Lai neh geh sră nggal jal mhar bè broă lam lơh ală broă lơh rcang sơdră kòp as sồt kơltau tàm rơpu, kơnrồ tàm ù tiah càr dê.

Jat hơ̆, UBND càr Gia Lai sồr ală tiah mờ gah lơh sa suơn sre lơh jat niam ală broă lơh kơryan kòp bơtờp uă, blơi sơnơm vaccie cĭt ai mpồl phan poan jơng in, lơh jat broă lơh dong kờl mờ tơ̆p pơr gŭc phan kòp, sền gròi niam phan poan jơng mờ rcang lài ală gùng dà broă lơh.

Cau mblàng K’Hạnh