VOV4.K’ho- Ủy ban Nhân dân càr Gia Lai bơyai lơh pơrjum pơlam lơh jat kơnòl broă cau atbồ ală anih lơh broă, mpồl lơh broă tàm broă lam lơh kơnòl broă mờ broă lơh jat Kơrnuat lơh broă bơh Ủy ban Nhân dân càr dê. Tàm 5 nam do, ală anih lơh broă, mpồl lơh broă càr dê neh lam lơh jat nền nòn kơrnuat lơh broă bơh Ủy ban Nhân dân càr dê tơngai bơh nam 2016 tus nam 2021 mờ jơnau đơs lơh broă “Lơh jat nền nền kơrnuat lơh broă, sơlơ tơnguh kơnòl bơh cau atbồ dê, tơnguh cồng nha cribơyai, pơgồp bal bơh ală kấp, ală gah broă lơh dê”.

Đơs pơn dut pơrjum, Chủ tịch Ủy ban Nhân dân càr Gia Lai, ồng Võ Ngọc Thành sồr cau atbồ tơl anih lơh broă, mpồl lơh broă tơnguh rlau tai jơnau git wă geh kơnòl tàm broă lam lơh kơnòl broă jat di nùs nhơm Jơnau sồr sồ 1 bơh Chủ tịch Ủy ban Nhân dân càr mờ kơrnuat lơh broă bơh Ủy ban Nhân dân càr dê; bơyai lơh kờp sền wơl kơrnuat lơh broă bơh tơl sở, gah broă lơh dê. Tơl anih lơh broă, mpồl lơh broă pal geh bơta tam pà kơnòl tàm broă lam lơh kơnòl broă, mơya cau atbồ pal git loh tơl làm gah, broă lơh, ù tiah geh jàu drơng broă.

Cau mblàng K’Duẩn