VOV4.K’ho – Dùl broă ờ huan geh ngan neh gơlik geh tàm Mpồl atbồ brê rơcang gàr bồ tô Đăk Đoa, càr Gia Lai dê, tu\ mpồl do chu nhơt ro nàng rơcang sơndră ồs sa brê mơya lơh gơbàn ồs sa brê mờ ồs sa gơ rề tus mìr bơh ală hìu bơnhă làng bol gùt dar dê. Bơta pal đơs là tơ nơ\ 3 nhai, broă do hơ\ sồng geh yal tus kấp geh gơnoar nàng lùp khàu mờ bơsong.

Bơh tiah tàm gùl xã Hà Đông, kơnhoàl Đăk Đoa, bol a` lòt rlau 10 kơi sồ gùng brê nàng tus Tiểu khu 407, bơnah brê gơwèt Mpồl atbồ brê rơcang gàr bồ tô Đăk Đoa dê. Tàm do, dùl bă brê ơnàng ngan neh gơtìp ồs sa jơh. Tàm ù gơ đềt bềng kơmbuh bùh, ală tờm chi nho gơtìp tus tềng cồng tơn. Ồng Nguyễn Hồng Quân, phó Kuang atbồ atbồ mpồl atbồ brê rơcang gàr bồ tô Đăk Đoa dờp, bă brê do gơtìp ồs sa tàm lồi nhai 12 nam lài tu\ mpồl do chu nhơt ro nàng rơcang sơndră ồs sa: “Ồs sa gơlik geh là tài bơh mpồl lơh jat sră pơrgon mờ cau lam lơh bơnah broă rơcang sơndră ồs sa nam 2018. Tơngai lam lơh là lồi  nhai 12. Tàm tu\ lam lơh den mpồl kung go\ là kuang bàng gròi sền ờ hềt nền nòn, mờ tơngai pơlam làng bol in den kung ờ hềt niam sơl. Mpồl geh ai mờng chài nàng tơngai tus lơh niam rlau tai.”

Bơta pal đơs là bu\lah broă ồs sa brê neh gơlik geh tus tu\ do là rlau 3 nhai, mơya tus tu do, ală anih lơh broă geh gơnoar bơh càr Gia Lai dê hơ\ sồng dờp jơnau tơnggit bè broă do mờ sồr mpồl lơh broă lòt sền nàng bơsong. Sở Nông nghiệp mờ Phát triển nông thôn càr Gia Lai đơng lam mpồl lơh broă làm gah geh Chi cục Kiểm lâm pơgồp bal mờ Hạt Kiểm lâm kơnhoàl Đăk Đoa, UBND xã Hà Đông mờ Mpồl atbồ brê rơcang gàr bồ tô Đăk Đoa lòt sền mờ đal git bơta geh ngan. Bơh hơ\, pà git geh rlau 105 rbô thơk vuông brê nho lơh sa mờ brê rơcang gàr bồ tô geh tam bơh nam 2003, 2004 mờ 2010 gơtìp gơtìp ồs sa, gơ wèt 2 Tiểu khu là 407 mờ 412, ù tiah gơwèt xã Hà Đông. Mpồl lơh broă làm gah kung gam đo was suơn mìr bơh làng bol dê gơtìp ồs sa tài bơh ồs sa brê gơ rề tus nàng sồr mpồl tờm brê tơm wơl hoàc huơr.

Să tờm lòt sền tơn brê, ồng Trương Văn Nam, Phó Kuang atbồ phòng atbồ sền gàr brê, Chi cục Kiểm lâm Gia Lai pà git, neh geh ală broă lơh tìs tàm tu\ chu nhơt ro bơh mpồl tờm brê dê: “Mpồl atbồ brê rơcang gàr bồ tô Đăk Đoa chu nhơt ro lài, mơya chu ờ di tu\ tơngai. Jat broă rơndap lơh là pal chu bơh 6 tus 9 jiơ drim halà bơh 5 jiơ mho, mơya tàm do cau tờm lơh neh chu gờ` ir halà jơla ir den tàng càl khồm lơh gơbàn ồs sa bè do.”

Tây Nguyên gam mut tàm nhai prang duh uă, git nđờ rhiang rbô lồ brê gam pơhìn gơbàn ồs sa tàm khà ngòt rơ ngơt ngan. Broă lơh rơcang sơndră ồs sa brê gam geh ală gah lơh broă, ală kấp đơng lam lơh krà` ngan, uă tiah gam lơh ngan nàng rơcang sơndră ồs sa. Mơya broă Mpồl atbồ brê rơcang gàr bồ tô Đăk Đoa lam lơh ală broă lơh rơcang sơndră ồs sa mơya lơh gơbàn ồs sa brê ai go\, pal sền wơl nền nòn mờ bơsong broă lơh do, pleh lời gơlik geh ală broă ndrờm bè do tai.