VOV4.K’ho- Tây Nguyên gam mŭt tàm kàl prang, trồ tơngai duh jŏ jòng sùm tàm tŭ tơngai do neh lơh gĭt nđờ jơ̆t rbô lồ brê tàm càr Gia Lai dê ơm tềng đăp bơta pơhìn gơbàn ồs sa uă. Nàng rơcăng lài tàm broă lơh rơcăng sơndră ồs sa brê, càr neh geh broă rơndăp lơh, mơkung lam lơh dùl ròt bal uă broă lơh nàng kờñ rơcăng lài sơndră wơl mờ jơh ală bơta lơi digơlan gơlik geh.

Làng bol ƀòn Đôch 1, xã Ia Kreng, kơnhoàl Chư Pah dờp jàu ătbồ mờ sền gàr mờr 700 lồ brê bơh Mpồl ătbồ brê rơcăng gàr bồ tô dà Ia Ly dê. Ală ngai lồi nhai pe pa do, trồ tơngai duh jŏ jòng lơh ală bă brê tàm do geh uă nhơ̆t ro, tờm proh tờm chir ƀươn ngan gơbàn ồs sa. Nàng rơcăng lài rơcăng sơndră, ƀồn Đôch 1 neh crơng gơs ală mpồl ătbồ, rơndăp uă anih drơng kơryan lòt sền, gròi sền sền gàr brê ngai kung bè mang tơn. Kuơmàng, mpồl geh broă rơndăp lơh geh chu nhơ̆t ru rơm lài geh bơta gròi sền uă lồ brê tàm ală tiah pơhìn ƀươn gơbàn ồs sa. Ồng Rơ Chăm Ho, ơm tàm ƀòn Đôch 1, xã Ia Kreng, kơnhoàl Chư Pah là dùl tàm ală hìu dờp jàu ătbồ mờ sền gàr brê pà gĭt: Geh bơta jàu kơnòl den bol añ crơng gơs puan mpồl lòt sền pah ngai, jơh nùs tus bal sền gàr brê, dilah geh ồs sơrbac mhar pơgồp bal mờ ală mpồl cau bè ling klàng làng bol griăp ƀòn xã dê, kuang àng, sơrbac mhar pùh ồs, halà kơryan ồs sa brê dùl bă di tŭ.

Làng bol ƀòn Đôch 1 pès nhơ̆t chu rŭ rơm rơcăng sơndră ồs sa brê

Mpồl ătbồ brê rơcăng gàr bồ tô dà Ia Ly gam ătbồ rlau 12 rbô 500 lồ brê. Bơh bồ kàl prang tơn, mpồl neh jàu kơnòl ai kuang bàng mờ cau lơh broă in sùm lòt sền, lòt rềp mờ gĭt wă broă gơlik geh tàm ƀòn lơgar, rơcăng lài gùng dà broă lơh 4 tơn dùl bă tiah, mơkung crơng gơs ală mpồl rơcăng sơndră ồs sa brê bal mờ mpồl cau gơguh tus gĭt nđờ rhiang nă cau. Mpồl kung lam lơh ală broă lơh bơta chài bè chu nhơ̆t rŭ rơm geh bơta pơlam, lơh ală gùng kơryan ồs gơwèt mờ ală bă brê geh pơhìn ồs sa uă.          

Ồng Phạm Thành Phước, Kuang ătbồ Mpồl ătbồ brê rơcăng gàr bồ tô dà Ia Ly, kơnhoàl Chư Pah, càr Gia Lai dê pà gĭt, bulah uă ngan bă brê bơh mpồl dê gơ ơm rah rài tàm uă tiah, mơya mpồl neh lam lơh ală gùng dà broă lơh kuơmàng nàng sơndră wơl mờ ồs sa brê. Tàm hơ̆, geh dùl bơnah dà kơlhề mờ bơta pràn dờng ngan gơ rê mờ làng bol tàm broă dong kờl mpồl pès nhơ̆t, was tơrgùm chu rŭ rơm geh bơta gròi sền nàng rơcăng sơndră ồ sa brê. Ồng Phạm Thành Phước, đơs: Bơta krơi is bơh kàl prang tàm Tây Nguyên dê là ro kơnrañ ngan, pơhìn gơbàn ồs sa khăt tàm tŭ lơi tơn, den tàng bè hơ̆ mpồl crơng gơs mpồl đơng lam rơcăng sơndră ồs sa brê. Ai tơlik gùng dà broă lơh, kĭ hơ mờ jơh ală ƀòn lơgar, ală hìu bơnhă làng bol kis rềp mờ brê mờ kĭ hơ mờ ală mpồl lơh broă tàm mpồl mờ ală xã geh brê jàu kơnòl ai ală mpồl in tus drơng kơryan là tŭ gơtìp ồs sa den yal mờ cau lơi, mờ lơh ală broă bè lơi nàng di tŭ kơryan ală bơta ồs sa brê.

Cau cih Hoàng Qui- Cau mblàng Lơ Mu K’Yến