VOV4.K’ho- Trồ tơngai duh jŏ jòng tàm ală tơngai pa do, neh lơh gĭt nđờ jơ̆t rơbô lồ brê tàm Gia Lai ơm tềng đap bơta pơhìn gơbàn ồs sa uă. Nàng rcang lài tàm broă lơh rcang sơn dră ồs sa brê, càr neh bơt bơtàu broă rơndap lơh, mơkung lam lơh dơ̆ lĕ bal uă broă lơh nàng rcang lài sơndră wơl mờ tơl bơta digơlan gơlik geh. Mpồl Atbồ brê rcang sơndră bồ tô dà Ia Ly gam atbồ rlau 12 rơbô 500 lồ geh brê.

Làng bol ƀòn Đôch 1 pềs jơh nhơ̆t rŭ rơm rcang sơn dră ồs sa brê

Bơh bồ kàl prang tơn, mpồl neh ai Kuang bàng, cau lơh broă sùm lòt sền, sền gĭt tiah brê, rcang lài bơt bơtàu gùng dà broă lơh 4 tàm tiah do tơn, mơkung crơng gơs ală mpồl, mpồl rcang sơndră ồs sa brê mờ mpồl cau gơguh tus gĭt nđờ rơhiang nă. Mpồl kung lam lơh ală broă lơh chài rơngơi bè chu rŭ rơm geh sền gròi, lơh ală gùng kơryan ồs sa gơwèt mờ ală bă brê geh bơta pơhìn ồs sa uă.

Cau mblàng K’ Hạnh