VOV4.K’ho- Di sa tềp Trung thu nam 2021, ngai 20/9, Mpồl kuang bàng bơh Ủy ban Nhân dân càr Gia Lai dê neh lòt còp, pà phan ai ală oh dềt tàm ală anih tam cah is tơrgùm bal mờ kơnòm dềt gam sơm kòp Covid-19 tàm càr. Tŭ do, gùt càr Gia Lai geh 92 nă oh dềt gam geh tam cah is tơrgùm bal mờ 23 nă oh gam sơm kòp Covid-19.

Tài ờ gơtùi jàu tơn phan ală oh dềt in, bơh kuang bàng cau ling tàm ală anih tam cah is, ală kuang bàng tàm mpồl lơh broă neh pơyua phan pà tus ală oh mờ nting bơr ală oh gơ lòng sồr, pràn kơldăng, gờñ lơh gơs dơ̆ tam cah is, pràn wơl nàng rê mờ hìu bơnhă. Bơdìh mờ phan pà bơh Ủy ban Nhân dân càr Gia Lai dê, tus mho ngai 20/9, neh geh mờr 1 rbô bơnah phan pà bơh ală mpồl, gah broă lơh, mpồl cau dê jàu pà ai ală oh dềt gam tam cah is tơrgùm bal mờ gam sơm kòp Covid-19 in. Ală bơnah phan pà neh mhar ngan geh ală kuang bàng, cau ling jàu tus tê ală oh dềt.

Cau mblàng K’Duẩn