VOV4.K’ho- Mpồl đơng lam rơcang sơndră kòp Covid-19 bơh càr Gia Lai dê neh bơyai lơh pơrjum pờ tơlik tơn tàm internet mờ Mpồl đơng lam ală kơnhoàl, thị xã, ƀòn dờng pơn jat tai lam lơh jat broă rơcang sơndră kòp bơtờp, gàr ờdo ờdă tĕ khà kuang bàng Quốc hội khóa 15 mờ Hội đồng Nhân ân ală kấp tơngai lơh broă bơh nam 2021 tus nam 2026. Tàm dơ̆ pơrjum, Thường trực Mpồl đơng lam neh yal tơnggit mờ pơlam mùl màl broă lơh rơcang sơndră kòp Covid-19 mờ gàr ờdo ờdă tĕ khà.

Đơs pơn dut pơrjum, Ủy ban Nhân dân càr sồr ală gah broă lơh, ală tiah pal geh rơndap broă ring bal tàm broă lơh rơcang sơndră kòp, gàr tơl ală phan bơna, ngan là phan sền gàr ai ală mpồl in tŭ tus bal lơh kơnòl broă. Ủy ban Nhân dân càr sồr pal ring bal bè broă rơndap lơh sơnơm bơsong sră pồ sàng goh, ring bal ală broă lơh gàr jat jơnau sồr nền nòn bè rơcang sơndră kòp Covid-19 tàm tĕ khà.

Cau mblàng K’Duẩn