VOV4.K’ho- Tàm ngai 24/6, bơh ală tŭ ai mẫu xét nghiệm tàm ală tiah ơm yah ngài tơrgùm bal, Anih tờm gròi sền kòp tê jê să càr Gia Lai sền gŏ tai 2 nă cau bơtờp dơ̆ dùl mờ virus Sars CoV-2, ndrờm ơm kis bal tàm ƀòn Yon Tok, xã Ia Glai, kơnhoàl Chư Sê. 2 nă cau do bơh Bình Dương rê tus càr Gia Lai bal mờ cau kòp sồ 13486.

Xét nghiệm dơ̆ dùl tàm ngai 21/6 geh cồng nha ờ bơtờp mờ virus Sars CoV-2; xét nghiệm dơ̆ 2 tàm ngai 24/6 geh cồng nha bơtờp mờ virus Sars CoV-2. Tŭ do, să jan bơh 2 nă cau kòp do dê bè ờs, tơm bơh bơr pràn, ờ bơsiă, ờ duh să mờ gam geh pơn jăt tai kham sơm kòp. Gơrềng tus 2 nă cau kòp do, ală anih lơh broă geh gơnoar càr Gia Lai dê neh ai mẫu xét nghiệm 6 nă cau F1 tàm ală kơnhoàl: Chư Sê, Phú Thiện mờ Krông Pa. Tŭ do, ală mẫu xét nghiệm bơh kơnhoàl Chư Sê mờ Phú Thiện dê neh ai cồng nha ờ bơtờp. Lơh pràn rơcăng sơndră kòp Covid-19, càr Gia Lai kung gam dờp mờ lơh jăt jơnau sồr ơm yah ngài tơrgùm bal 449 nă cau, tàm hơ̆ geh 400 nă cau tàm lơgar mờ 49 nă cau rê bơh lơgar ndai.

Cau mblàng Lơ Mu K’Yến