VOV4.K’ho- Jăt Kụk Tơrgùm kờp càr Gia Lai dê yal, nam 2021, khà gơguh lơh sa geh 9,71%; kờp jơh priă bơcri jơh gùt mpồl bơtiàn geh 70 rbô tơmàn đong, jơnhoa rlau 2,45 dơ̆ pơndrờm mờ nam lài. Pal sền ngăc ngan là tă dia dà lơgar gơguh uă nisơna, mờ 7 rbô 592 tơmàn đong, gơguh mờr 167%. Khà tă dia do gơguh dùl bơnah là kơnờm bơh geh 17 rơndăp broă lơh đèng càl geh lơh, mờ pràn lơh gơlik rlau 1 rbô 242 me ga wat; uă rơndăp broă lơh ròng sur uă, kông nghệ cao ai mŭt lơh broă.

Gia Lai geh 11 rơndăp broă lơh đèng càl geh ai mŭt lơh broă

Nam 2021, kờp jơh priă geh bơh tăc phan mờ lơgar ndai bơh càr Gia Lai dê geh 610 tơlak dolar Mỹ, gơguh rlau 5%; tàm hơ̆, kơphê mờ plai chi là ală gah phan geh uă ngan, kơnòm ngui niam bơta ƀươn bơh Hiệp địñ EVFTA dê. Jơh gùt càr geh tai 13 xã mờ 2 kơnhoàl lơh gơs ală broă jàu ƀòn lơgar pa. Kwơmàng, nam do òr, Kơh bơnơm Kon Hà Nừng neh geh UNESCO cih mat là Tiah prăp gàr ù tiah chi che brê bơnơm geh is dunia dê. Bơta do pờ tơlik tŭ tơngai niam uă ai càr in hòi jà ală rơndăp broă lơh sền gàr brê, lơh nhơl chờ mờ bơtàu tơnguh lơh sa tềng hơđơm mƀur chi brê.

 Cau mblàng Lơ Mu K’Yến