VOV4.K’ho - Geh ù mơya ờ geh lơh, ờ gơtùi tăc, ờ gơtùi ai nàng càn priă; hìu gơtìp sèt, geh tŭ ờ kơl jăp tai mơya ờ gơtùi lơh niam wơl, ờ gơtùi lơh pa. Hơ̆ là bơta bal bơh gĭt nđờ rơhiang hìu làng bol kis tàm ală sơnah ƀòn Trà Bá, Hội Phú, Ia Kring tàm tiah geh rơndăp broă lơh ƀòn ơm kis gùng Nguyễn Văn Linh (ƀòn dờng Pleiku, càr Gia Lai) gam gơtìp tàm rơlao gĭt nđờ jơ̆t nam do. Mơya kal ke, ờ gơtùi lơh tài rơndăp broă ờ lơh gơlời gời lơh gơbàn làng bol kis tàm do glar bòl mờ ờ sŭk ngan.

Geh bal tàm tiah geh rơndăp broă ù tiah lơh ƀòn ơm kis gùng Nguyễn Văn Linh, uă nam do, ùr bơklao ồng Bùi Văn Năm (kis tềng gùng Châu Văn Liêm, ƀòn dờng Pleiku) bal mờ ală kòn ồng dê pal kis tàm bơta hăt ngan tàm hìu dềt. Hìu tơnơ̆ mờ 21 nam ngui neh gơtìp sèt uă tiah tềng kơlĭk.

                           Hìu nhă ồng Quảng Văn Khiên ờ gơtùi lơh hìu tài rơndăp broă ờ lơh gam lời gời

Tàm kàl mìu, hìu sùm sùh dà tài dà bơh bơdìh gơmŭt tàm kơlĭk hìu; mờ rơkàng sơlo neh gơtìp sek, bŭ lah neh rơndăp 3 tăp, klơn mờ dơm chi, mơya kung gam gơtìp ñhăt sơl. 3 tàm 6 nă kòn ồng Nam dê neh bao, ndrờm pal lòt ơpah hìu ơm tài ồng ờ gơtùi ai ù, lơh hìu kòn in, bŭ lah bă ù ơnàng tus 1 sào: “Làng bol bol añ kis tàm tiah rơndăp broă lơh gơtìp kal ke tàm rài kis, bol añ dờp nàng dà lơgar lơh rơndăp broă ù tiah. Mơya lơh den pal lơh mhar, nàng rài kis bol añ geh ring niam, lời sùm bè do, rài kis bol añ glar ngan. Tài gùng lòt den ờ geh, trồ mìu den ntiar, hìu den sèt ñhăt mờ ờ gơtùi lơh niam wơl, lơh pa kung ờ gơtùi lơh”.

Rềp mờ hìu ồng Năm, hìu ồng Quảng Văn Khiên (deh nam 1970) kung glar bòl sơl. Ờ mìng ờ gơtùi tam pà ù ai 2 nă kòn in gam pal ơm ơpah hìu in, ồng Khiên gam gơtìp ngân hàng ờ ai broă ai ù nàng càn priă lơh sa tài ù geh tàm bă ù geh rơndăp broă ù tiah. Geh ù mơya gơtìp ờ ai ngui ală gơnoar ngui ù, ồng Khiên neh pơyoa uă sră tus mờ uă dơ̆ pơrjum tìp mờ cau tĕ khà ală cấp nàng đơs bè bơta glar bòl bơh hìu nhă ồng dê: “Geh ù mờ ờ gơtùi lơh hìu. Ù ờ gơtùi ai nàng càn priă mờ ngân hàng, ờ gơtùi tăc, Oh kòn tŭ do neh dờng, geh ù mờ pal ơm hìu ơpah. Làng bol kis tàm do geh uă sră pơyoa tus UBND ƀòn dờng Pleiku uă dơ̆. Bol añ kung lòt tus tàm ală dơ̆ pơrjum tìp mờ cau tĕ khà cấp càr, càr hơ là gam rơcang lơh, neh hơ tơl bơta mờ làng bol, mơya kung ờ gŏ lơh. Añ dan mờ UBND càr Gia Lai mờ UBND ƀòn dờng Pleiku di lah lơh rơndăp broă do den lơh mhar, di lah ờ lơh den sơbì rơndăp broă lơh nàng làng bol bol añ ring niam rài kis”.

             Tài rơndăp broă ờ geh lơh rơlao jơ̆t nam, den tàng ƀòn ơm kis do neh gơs "brê" tàm gùl ƀòn dờng Pleiku

Do kung là bơta kal ke bơh gĭt nđờ rơhiang hìu làng bol geh ù mờ hìu gơwèt rơndăp broă lơh tiah rơndăp broă lơh ƀòn ơm kis tềng gùng Nguyễn Văn Linh. Lài mờ hơ̆, rơndăp broă lơh do geh UBND càr Gia Lai kĭ mờ jào Công ty cổ phần bơcri priă Saigon Highland lơh nam 2009, mờ kờp jơh bă ù ơnàng 94 lồ. Mơya, tus nam 2015, công ty do ờ tơl pràn lơh di mờ tơngai, den tàng neh gơtìp toh wơl. Nam 2017, UBND ƀòn dờng Pleiku geh càr jào lơh wơl rơndăp broă gam 39,7 lồ gơwèt ù tiah ală sơnah ƀòn Trà Bá, Hội Phú mờ Ia Kring. Nam 2019, UBND càr Gia Lai pơn jăt tai jào UBND ƀòn dờng Pleiku lơh jăt rơndăp broă do mờ priă bơh kes priă.

Ồng Nguyễn Hữu Quế, Chủ tịch UBND ƀòn dờng Pleiku pà gĭt, ală gah lơh broă tàm ƀòn dờng gam lơh jăt ală broă lơh jăt rơndăp broă jăt tơngai lơh broă. Tŭ do, ƀòn dờng neh yal khà priă dong kờl tơm bơtơl ù mờ phan bơna tàm bă ù tàm tiah lơh rơndăp broă tus mờ Mpồl duh broă sền nàng gĭt khà priă càr.

Mơya, ồng Quế kung ờ gĭt tus tŭ lơi rơndăp broă do mùl màl geh lơh, mờ mìng đơs là geh lơh ngan lơh jăt rơndăp broă do tàm tơngai gờñ ngan. “Tơnơ̆ mờ tŭ geh Mpồl duh broă sền nàng gĭt khà priă bơh càr ring bal, ƀòn dờng geh lơh jăt ală broă lơh pơn jăt tai di jăt mờ broă lơh neh geh ai. Bol añ geh lơh ngan lơh jăt rơndăp broă lơh tàm tơngai gờñ ngan nàng geh gơnoar kuơ bơh bơh làng bol tàm tiah rơndăp broă lơh do”.

Mùl màl, mờ broă tơmù bơta uă broă lơh bơh rơndăp broă lơh ƀòn ơm kis gùng Nguyễn Văn Linh bơh 94 lồ gơmù gam 39,7 lồ, càr Gia Lai neh tơnklàs gĭt nđờ rơhiang hìu làng bol kis tàm ƀòn dờng Pleiku lĭk bơdìh bơta kơ̆p gơn. Gam gĭt nđờ rơhiang hìu làng bol ndai tàm tiah rơndăp broă lơh gam pal pơn jăt tai gơtìp “nam kơ̆p, nhai gơn”. Ală làng bol kơ̆p kờñ, “tơngai gờñ ngan” mờ kuang bàng đơng lam ƀòn dờng ai geh kờp mờ ngai, mờ nhai, ờ gơtùi kờp mờ nam jŏ jòng bè bơh nam 2009 tus tŭ do.

Cau cih Nguyễn Thảo-Cau mblàng Ndong Brawl