VOV4.K’ho- Tơnơ̆ uă ngai ờ geh cau kòp pa, drim ngai 26/09, tàm càr Gia Lai gŏ 17 nă cau bơtờp kòp Covid-19 pa tàm mpồl bơtiàn. Tàm hơ̆, geh 15 nă cau tàm ƀòn dờng Pleiku mờ 2 nă cau tàm kơnhoàl Đăk Đoa. Nền cê bè do, tàm ƀòn dờng Pleiku geh 15 nă cau kòp ndrờm gơrềng tus mpồl ƀòn 11, sơnah ƀòn Hoa Lư.

Tŭ do, Anih tờm Gròi sền kòp tê jê să càr Gia Lai dê neh jòi bàn geh 22 nă cau là F1, 26 nă cau là F2 geh gơrềng tus mpồl cau kòp do. Pal sền ngăc ngan là, 2 nă cau kòp pa gŏ tàm kơnhoàl Đăk Đoa ndrờm rê bơh ƀòn dờng Hồ Chí Minh tàm mang ngai 21/09 mờ rơndeh ô tô is, mơya yal mờ cau lơh sơnơm in ờ song nàng pồn ờ bài kờñ lòt ơm yah ngài tơrgùm bal. Tŭ yal mờ cau lơh sơnơm in tàm hìu sơnơm Ađơk, kơnhoàl Đăk Đoa, gơnoar ătbồ xã neh geh kơrnoat ai ơm yah ngài tàm hìu bơh ngai 25/09, mơya jơh bal 2 nă cau ờ lơh jăt niam, kung gam lòt rê uă tiah tàm ƀòn dờng Pleiku mờ kơnhoàl Đăk Đoa.

Cau mblàng Lơ Mu K’Yến