VOV4.K’ho - Anih lơh broă Cảnh sát lơh broă sa (kuang àng càr Gia Lai) pơgồp bal mờ ală mpồl lơh broă geh gơnoar tàm kơnhoàl Kbang, càr Gia Lai pa gŏ tai 1 mpồl lơh sa kă bro cau dùl nă să lơh is geh gĭt nđờ jơ̆t khối chi ờ gĭt loh anih lơh.

                             Mpồl lơh broă geh gơnoar tus kờp sền ală gơl dơm chi tàm anih prăp gàr

Bơta kờñ đơs ngan, tài cau tờm mpồl lơh sa kă bro ờ lơh broă bal, den tàng roh uă ngan ngai, mpồl lơh broă geh gơnoar hơ̆ sồng bơyai lơh lùp sền anih prăp chi. Drim ngai 15 nhai 7, cau tờm anih prăp chi pờ mpồng, mpồl lơh broă geh gơnoar neh mŭt sền, gŏ lài ngan di pơgăp 18 khối dơm chi neh òt, uă bơta. Bơh 1 ngai mang jăt mờ kơrnoăt geh ai, cau tờm mpồl lơh sa kă bro ờ ai geh cơng tàng lơi dơm chi geh lơh bơh tiah lơi mờ sră nggal gơrềng bal. Bơta ni sơna là, tàm broă mpồl lơh broă geh gơnoar gam sền, kờp dơm chi, geh 7 nă cau klao neh jòi tus, dờp là neh pơyoa khà dơm chi do tàm anih prăp gàr mpồl lơh sa kă bro Mai Hồng.

Tŭ do, mpồl lơh broă kuang àng càr Gia Lai mờ kuang àng kơnhoàl Kbang gam bơyai lơh lùp khào, lơh loh broă do. Dùl khà dơm chi tàm broă do neh geh pơn diang rê tus anih mpồl sền gàr brê kơnhoàl Kbang nàng kơ̆p bơsong.

Cau mblàng Ndong Brawl