VOV4.K’ho- Bulah kòp Covid-19 gam gơlik geh kal ke, mơya 6 nhai do, càr Gia Lai kung gam lơh geh khà gơguh lơh sa 9,7%. Cồng nha do geh pơgồp bơnah bơh broă càr lơh gơlik bơta niam bơtàu tơnguh 2 gah lơh sa tờm là năng lượng lơh gơlik wơl mờ ròng phan công nghệ cao.

Hơ̆ là jơnau đơs geh ai tơlik tàm Pơrjum Ban Chấp hành Đảng bộ càr dơ̆ 4 (rề ơnàng) geh Tỉnh ủy Gia Lai bơyai lơh tàm ngai 02/7. Jat jơnau yal tàm pơrjum, 6 nhai do, kờp jơh priă lơh geh bơh lơh sa mờ măi mok càr dê geh rlau 11 rbô tơmàn đông, gơguh rlau 17% pơndrờm mờ bal dùl tŭ nam lài; kờp jơh priă bơcri gùt mpồl bơtiàn tàm Gia Lai kờp dŭ geh mờr 33 rbô 500 tơmàn đông. Nggùl tàm khà do geh lơh gơlik uă ngan bơh broă lam lơh ală rơndap broă ồs đèng càl tàm càr, mờ khà priă bơcri rlau 17 rbô tơmàn đông. Bal mờ hơ̆, tŭ do Gia Lai geh 33 rơndap broă ròng phan công nghệ cao neh geh ai gơnoar bơcri priă, mờ priă bơcri rlau 4 rbô 500 tơmàn đông. Kung tàm tơngai lài, càr neh tam pa 131 lồ brê, tam gơl rlau 700 lồ chi tam ờ huan geh cồng nha.

Cau mblàng K’Duẩn