VOV4.K’ho- Gùng dà broă lam sồr tơnguh bơtàu năng lượng măt tơngai bơh Thủ tướng Chính phủ tàm Kơrnoăt sồ 13 nam 2020 là gùng dà broă lơh di pal nàng tơl năng lượng dà lơgar in. Mùl màl tàm càr Gia Lai, tŭ lơh mùl màl gùng dà broă lơh do, bal mờ broă geh uă mpồl lơh sa kă bro lơh rơndăp broă lơh sa suơn sre nàng geh dờp khà priă tăc ồs đèng uă ngan ngui ai ồs đèng măt tơngai lơh hờ đang rơkàng hìu in, den gam bơta jơnkah ồs đèng uă rơlao bàr dơ̆ mờ broă kờñ lơh ồs đèng măt tơngai gam lơh gĭt nđờ rơhiang mpồl lơh sa kă bro bơcri priă tàm gah do gơtìp koh sơbì (hơ̆ là koh ờ blơi ồs đèng) pơdar bal.

Bơta do neh gơtìp bơh bồ nam 2021 tus tŭ do, mờ ờ hềt gĭt tus tàm tŭ lơi hơ̆ sồng tơn jơh, lơh cau bơcri priă gơtìp ờ sŭk tài ờ geh tơnhào khà priă uă mờ gơtìp ờ gơtùi rơcang tàm broă kă bro.

Ồng Võ Ngọc Quý, Phó kuang atbồ gah lơh ồs đèng càr Gia Lai dờp, gah lơh ồs đèng neh yal lài geh bơta jơnkah ồs đèng bơh tàm nam 2020, tŭ lơh jăt jơnau ring bal tơrbŏ bal mờ mpồl lơh sa kă bro. Den tàng, 70 tàm 463 nă cau bơcri priă ring bal geh tơrbŏ bal lồi nam 2020 ndrờm pal kĭ tai jơnau ring bal ing bè broă ring bal gơtìp koh ồs đèng di lah uă ir, bè dùl bơta nàng geh gah lơh ồs đèng ai tơrbŏ mờ lơh broă bal tàm broă kă bro ồs đèng. Tàm hơ̆, geh 35 mpồl geh sồr crăp tai phan nàng gah lơh ồs đèng lơh jăt broă til, koh ồs đèng bơh ngài tàm bơta jal mhar.

Mùl màl tŭ do, kờp jơh bơta pràn bơh ală rơndăp broă ồs đèng măt tơngai lơh hờ đang rơkàng hìu tàm càr Gia Lai là rơlao 603 MWp, uă rơlao bàr dơ̆ mờ broă kờñ ai ồs đèng tàm tiah do dê là 300 MWp. Bơta do geh bal broă kờp gơguh tàm gùng che ồs đèng di pơgăp 10% tàm 1 nam bơh gah lơh ồs đèng dê gơtìp tìs pơn drờm mờ mùl màl, lơh broă ai ồs đèng neh jơnkah, tŭ do gam jơnkah rơlao: “Tàm tŭ tơbŏ, jăt broă kờp bơh gah lơh ồs đèng dê tơl pràn nàng bơsong bơta pràn ồs đèng cau bơcri priă in. Mơya, bơta ndai tai là tài gơtìp bơh kòp Covid-19, khà pràn gơguh ồs đèng ờ di bè jơnau kơlôi là bơh 9 tus 10% tàm 1 nam, mơya mùl màl mìng gơguh bơh 1 tus 2%. Bè hơ̆, gam bơh 70 tus 80% khà ồs đèng jơnkah mờ pal geh ai tus tàm gùng che ồs đèng, lơh gơtìp jơnkah mờ uă ir tàm ờ uă gơl gùng che ồs đèng. Mùl 1 neh geh tàm jơnau kơlôi sơnơng là jơnkah den tàng neh hơ bal, pal dờp bơta do. Hơ̆ là bơta rềs àr tàm broă bơcri priă, den cau bơcri priă pal tam pà bal mờ gah ồs đèng”.

Mò Trần Thị Diễm, cau tờm bơh broă lơh ồs đèng măt tơngai hờ đang rơkàng anih lơh sa mờ bơta pràn 1 MWp tàm xã Chư Hậu, kơnhoàl Ia Grai, càr Gia Lai pà gĭt, bơh nhai  1 nam 2021 tus tŭ do, pah poh, broă lơh ồs đèng măt tơngai mờ bơta pràn 1 MWp mò dê gơtìp koh ồs đèng 1 ngai, lơh hoàc huơr di pơgăp 50 tơlăk đong tàm 1 nhai. Mò Diễm pà gĭt: nàng bơcri priă lơh ồs đèng do, mò neh tă 15 tơmàn đong, tàm hơ̆ càn priă bơh ngân hàng 10 tơmàn đong.

Jăt jơnau kơlôi sơnơng lài ngan, di lah broă lơh ồs đèng do lơh jơh bơta pràn, den tơnơ̆ mờ 7 nam geh bơsal wơl khà priă neh tă. Mơya, broă koh ồs đèng gơtìp sùm bơh gah lơh ồs đèng tŭ do dê neh lơh rơndăp broă lơh sa kă bro mò dê gơtìp kal ke: “Añ gŏ hoàc huơr ồs đèng, lơh ờ niam tus mờ bơta kuơ bơh mpồl lơh sa kă bro dê. Tŭ do, jăt tơngai tam pà bơh gah ồs đèng càr Gia Lai dê, den bol añ gơtìp koh bơh 4 tus 6 ngai tàm 1 nhai, lơh ờ niam tus mờ broă geh khà priă tàm nhai bol añ dê gĭt nđờ jơ̆t tơlăk đong, lơh lơyài tàm broă tơm priă ngân hàng, lơh gơtìp ờ gơtùi rơcang lài priă jền lơh broă”.

Mùl màl, tŭ do, jơh 463 broă lơh ồs đèng măt tơngai hờ đang rơkàng anih lơh sa kă bro tàm càr Gia Lai ndrờm gơtìp koh sơbì ồs đèng jăt 2 bơta là mhar mờ jăt rơndăp broă geh yal lài. Jăt mờ hơ̆, ală mpồl lơh broă neh sồr crăp tai phan til, koh bơh ngài geh gơtìp koh tàm tŭ jal mhar, tàm tŭ lơi jơnkah ồs đèng, uă ir tàm ờ uă gơl gùng che ồs đèng. Gam ală anih lơh broă ndai geh gơtìp koh bơh 4 tus 10 ngai tàm 1 nhai. Bơta kờñ đơs ngan tai là broă koh sơbì sùm gơtìp tàm nggùl ngai, tŭ bơta pràn duh bơh măt tơngai geh uă ngan, kung là tŭ ală phan lơh broă do ai geh uă ngan ồs đèng.

Dùl nă cau tờm lơh ồs đèng măt tơngai bơcri 15 tơmàn đong lơh geh mờr 1 MWp ồs đèng măt tơngai hờ đang rơkàng hiù tàm kơnhoàl Ia Grai yal, bŭ lah ờ kĭ hơ ring bal koh sơbì, mơya kung gam gơtìp koh sùm ồs đèng sơl: “Tàm dùl ngai gơtìp koh ồs đèng là roh 8 tơlăk đong, tơngai tơrgùm wơl priă gơtìp jŏ. Tàm bơta kă bro bal den ờ di pal. Tài cau bơcri priă bơh broă rơcang kờp geh bơta kuơ bơh să tờm den gơs cau gơtìp kal ke tài lơh geh kàr hơ̆ ồs đèng mờ ờ gĭt geh tăc kàr lơi den loh làng ală jơnau kơlôi sơnơng ndrờm gơtìp roh jơh”.

Ồng Phạm Văn Binh, Kuang atbồ Sở Công thương càr Gia Lai pà gĭt, càr geh bơta duh uă mờ geh broă lơh ồs đèng di pal mờ broă tơnguh bơtàu ồs đèng măt tơngai. Mơya, pal kơ̆p tus tàm tŭ geh gùng dà broă lam sồr tàm Kơrnoăt sồ 13 nam 2020 den ală cau bơcri priă, gah lơh ồs đèng neh geh tam khà ồs đèng ndrờm bal mờ bơta pràn bơh hìu măi pờ tơlĭk ồs đèng Ialy dê.

Mơya, mùl màl tŭ do, broă gah ồs đèng ring bal tơrbŏ uă, lơh khà ai ồs đèng jơnkah uă rơlao bàr dơ̆ mờ broă kờñ den tàng lơh gơtìp bơta koh sơbì wơl gam lơh gơtìp hoàc huơr khà ồs đèng kloh niam mờ hoàc huơr uă ngan bơta pràn bơh cau bơcri priă dê. Di lah pơn drờm mờ broă kă bro, mờ là anih tờm blơi ồs đèng, mơya tŭ tơrbŏ geh uă ir rơndăp broă lơh, lơh broă ai geh ồs đèng uă rơlao mờ broă kờñ ngui, den tàng loh làng EVN gam lơh geh dùl broă kă bro mờ mìng să tòm geh kuơ, lơh gơtìp bơta ờ geh kuơ bal mờ bơta ờ gơtùi rơcang lài ai ală cau bơcri priă dê, lơh ală cau do gơtìp tàm bơta ờ sŭk mờ broă lơh kă bro ồs đèng măt tơngai.

Cau cih Nguyễn Thảo- Cau mblàng Ndong Brawl