VOV4.K’ho- Tŭ do, tàm càr Gia Lai geh rlau 468 rbô lồ brê geh tă tơm priă sền gàr brê ai ală mpồl dờp ơpah sền gàr in. Mùl màl ai gŏ, broă lơh tơm priă sền gàr brê ai ală ƀòn làng bol in neh cèng wơl cồng nha tàm broă lơh sền gàr brê tàm Gia Lai, dong làng bol hời rơ hời tam gơl mờng quèng, tơrmù ƀà bơta mus kơl brê.

Jat bơta tam pà kơnòl bơh ƀòn Kon Chrah dê, nggùl nhai 11 nam 2021, ồng Băk mờ 2 hìu bơnhă ndai bal mờ ală kuang bàng Mpồl atbồ brê rơcang gàr bồ tô Hra, xã Hra, kơnhoàl Mang Yang lòt sền tàm bă ù rlau 950 lồ brê geh jàu ơpah, sền gàr. 

                            Làng bol pơgồp bal mờ kuang bàng sền gàr brê lòt sền, sền gàr brê sùm

Ồng Băk pà git, tơl dơ̆ lòt sền roh mờr 2 ngai mang. Dilah bè lài do, làng bol tàm ƀòn mus kơl chi brê nàng lơh hìu halà mus kơl brê lơh mìr; den tŭ do, làng bol Kon Chrah bal mờ gơp sền gàr brê mờ geh tă tơm 400 rbô đong tàm 1 lồ tàm 1 nam. Tam pà bal tơl hìu bơnhă geh 9 tơlak 500 rbô đong pah nam bơh broă dờp jàu ơpah, sền gàr brê. Do là bơnah priă kơ̆ kơljap sùm dong làng bol tơnguh niam rài kis. Ồng Băk pà git: “Tàm ƀòn, bol hi kung mblàng yal uă ngan. Brê den dà lơgar jàu bol hi in, ƀòn lơgar ờ gŏ di mus kơl brê, ờ di chu tơdau lơh mùr. Dilah git gŏ lơh mìr, den bol hi yal anih lơh broă geh gơnoar in. 6 nhai, dà lơgar tong priă dùl dơ̆, den bol hi kung ờ huan kal ke, tơn jơh jơgloh, tơrmù rƀah”.

Ồng Nguyễn Văn Chín, Kuang atbồ Mpồl atbồ brê rơcang gàr bồ tô Hra, kơnhoàl Mang Yang pà git, kờp jơh bă ù tam sền gàr brê mờ mpồl geh jàu sền gàr là rlau 13 rbô 800 lồ, tàm hơ̆ geh rlau 10 rbô 400 lồ brê geh is. Brê tàm do geh khà dơm uă ngan, uă bơta dơm chi geh bơta kuơ dờng ngan. Brê rềp gùng rơndeh 19, rềp mờ mìr làng bol dê den tàng broă lơh sền gàr brê geh tŭ tơngai gơtìp uă ngan kal ke. Bulah bè hơ̆, bơh tŭ jàu ơpah sền gàr rlau 6 rbô 400 lồ brê ai 376 hìu bơnhă làng bol in, tàm hơ̆ uă ngan mìng là cau Bahnar tàm 12 ƀòn kis rềp brê, den cồng nha sền gàr brê geh tơnguh loh làng ngan: “Tàm broă lơh atbồ mờ sền gàr brê, kơnờm tàm làng bol là uă ngan. Dơ̆ 2 là sơlơ tơnguh broă lơh mblàng yal, hòi jà; lam lơh niam gơnoar broă cau geh bơngă pin dờn tàm mpồl bơtiàn dê nàng mblàng yal, tơngkah rơngal làng bol. Uă nam do, tàm ù tiah ƀòn lơgar bol hi dê ờ geh bơta sơ gràm ù brê. Brê bol hi atbồ, sền gàr geh gàr kơ̆. Bơh ală dơ̆ lòt sền, sền sơ wì, bă brê bol hi dê ờ gơmù.”

Ồng Nguyễn Xuân Thưởng, Phó Kuang atbồ Kes priă sền gàr mờ bơtàu tơnguh brê càr Gia Lai pà git, nam 2021, càr Gia Lai geh rlau 468 rbô 700 lồ brê geh tă tơm priă sền gàr brê. Tàm khà hơ̆, geh 123 rbô lồ brê geh jàu ai rlau 10 rbô 600 hìu bơnhă làng bol tàm ală ƀòn làng bol ơm kis ngan, uă ngan mìng là cau Jrai, Bahnar ơm kis rềp brê sền gàr. Broă tơm priă jàu ơpah sền gàr brê geh kuơ dờng màng ngan gơ wèt tus mờ làng bol tàm ƀòn lơgar, tài do là priă kơ̆ kơljap jŏ jòng sùm nàng làng bol in blơi sơntìl, phan ngui lơh sa suơn sre, bơcri priă, tơnguh cồng nha broă lơh sa suơn sre. Tŭ rài kis làng bol geh tơnguh niam den geh tơrmù bơta gơ wèt tàm brê, pơgồp bơnah sền gàr brê: “Rlau 10 rbô 600 nă làng bol mut tàm brê sền gàr brê, den dilah geh bơta mus kơl brê lơh mìr, khi git gŏ mhar ngan. Jơh ală làng bol kis rềp brê, ngan là cau jơi bơtiàn kòn cau dùl êt nă cau geh dờp proă sền gàr brê. Bơh priă jền lơh geh, cau gŏ bơta kuơ brê dê. Gơtùi gàr brê den geh tai priă jền, lơh sa hơ đơm mƀur brê, lơh pas bơh brê. Cồng nha bè hơ̆ den hơ̆ sồng gơtùi tam gơl jơnau git wă.”

Mùl màl bơh càr Gia Lai neh ai gŏ bơta di gùng di dà bơh broă lơh tơm priă sền gàr brê dê: Broă sền gàr brê kờñ geh cồng nha pal kơnờm tàm ƀòn làng bol ơm kis, cèng wơl bơta kuơ ai làng bol in kis rềp mềr mờ brê.

Cau mblàng K’Duẩn