VOV4.K’ho- Tàm dơ̆ ơm rlô ngai 30/4 mờ ngai 01/5 pa do, ală gah broă lơh, ală tiah tàm càr Gia Lai lơh jat jơnau sồr bè broă ờ bơyai lơh ală broă lơh nhơl ñŏ, lơh prài bồ tơngoh, ală broă lơh tơrgùm gal cau, lơh jat ală jơnau sồr bè rơcang sơndră kòp Covid-19.

Kờp jơh khà nac nhơl chờ, lòt sền tàm càr tàm dơ̆ ơm rlô chờ kờp dŭ geh 23 rbô 370 dơ̆, gơguh 2,9 dơ̆ pơndrờm mờ nam 2020; kờp jơh priă lơh geh bơh nhơl chờ kờp dŭ geh 4 tơmàn 500 tơlak đông, gơguh 4 dơ̆ pơndrờm mờ bal dùl tŭ nam 2020. Broă lơh kă bro tàm ală hìu nac bơh 1 tus 4 sơmañ, anih ơm rlô să, khà ơpah cơldŭ geh bơh 90 tus 100%. Nac tus tàm càr uă ngan bơh ƀòn dờng Hồ Chí Minh, Hà Nội, Đà Nẵng, Bình Định, Dak Lak, Bình Dương. Kờp jơh khà nac ơm wơl tàm ală hìu nac geh mờr 4 rbô dơ̆, gơguh 2,9 dơ̆ pơndrờm mờ bal dùl tŭ nam 2020. Ală kong ti bơyai lơh nhơl chờ jun mờr 140 dơ̆ nac.

Cau mblàng K’Duẩn