VOV4.K’ho- Mờ jơh nùs lơh ngan“Sơn dră kòp bè tam dră mờ bol sò tơm” làng bol ală xã tiah nhàr lơgar tàm ù tiah càr Gia Lai tus bal is kĭ hơ bal mờ kấp ủy, gơnoar atbồ tiah do dê mờ ală mpồl lơh broă geh gơnoar tam dră, yă broă lơh lik mut tàm lơgar tìs mờ kơrnoat boh lam nàng kờñ kơryan kòp Covid-19 bơtờp uă.

Kòp Covid-19 tàm lơgar he ngai sơlơ gơlik geh kal ke, ờ gơtùi gĭt lài mờ pơn jat tai geh ală cau bơtờp kòp pa tàm ală ngai do. Ai tàm lơgar rềp bal Campuchia, kòp kung bơtờp uă ngan tàm uă càr, ƀòn dờng. Den tàng, uă nhai do, mpồl ling sền gàr tiah nhàr lơgar càr Gia Lai lơh ngan lơh anih kơryan, lơh kràñ atbồ tiah nhàr lơgar nàng lơh jat geh cồng nha “kơnòl broă dơ̆ lĕ bal”. Pa do, Gah đơng lam ling klàng càr Gia Lai neh ai tai 48 nă Kuang bàng, ling geh griăt mờng lơh broă  lòt tus tàm gơl gùng tiah nhàr lơgar nàng tus bal mờ mpồl ling sền gàr tiah nhàr lơgar lơh jat kơnòl broă lòt sền, sền gròi, jơh nùs lơh ngan tam dră mờ ală cau lik mut tàm lơgar tìs mờ kơrnoat boh lam, kơryan ờ lời kòp bơtờp uă bơh tiah nhàr lơgar.

Nàng hòi jà bơta pràn bơh làng bol dê tàm broă lơh rcang sơndră kòp Covid-19 mờ tam dră kơryan broă lik mut tàm lơgar tìs mờ kơrnoat boh lam, bơh bồ nhai 5 pa do, Thường trực Tỉnh ủy Gia Lai neh geh sră nggal sồr kấp ủy, gơnoar atbồ, anih lơh broă, mpồl lơh broă, ngan là ală xã tiah nhàr lơgar jat tàm gơnoar broă, kơnòl broă pơgồp bal mờ mpồl ling sền gàr tiah nhàr lơgar lam lơh, bơyai lơh srơh “Gùt làng bol tus bal rcang sơndră kòp Covid-19 mờ broă lik mut tàm lơgar tìs mờ kơrnoat boh lam” nàng kờñ kơryan broă lik mut tàm lơgar tìs mờ kơrnoat boh lam tàm tiah nhàr lơgar. Đơs bè broă do, ồng Nguyễn Trọng Phú-Chủ tịch UBND xã Ia Pnôn (kơnhoà Đức Cơ) pà gĭt, broă lơh mblàng yal gam geh xã pơgồp bal lam lơh mờ uă ngan broă lơh. Xã neh ai mpồl ling griăp ƀòn lơh broă sùm lòt tus ală anih sền gròi kòp nàng tus bal mờ Mpồl ling sền gàr tiah nhàr lơgar, sền gròi tiah nhàr lơgar. Mờ xã kung pơgồp bal mờ Mpồl lơh broă tàm ù tiah bơh Pôs đồng ling sền gàr tiah nhàr lơgar Ia Pnôn hòi jà ală hìu bơnhă tàm ù tiah do dê kĭ hơ lơh jat niam ală broă lơh rcang sơndră kòp, bañ lik mut tàm lơgar tìs mờ kơrnoat boh lam, bañ tus bal, tàm dong kờl bal, lam mpồl cau lik mut tàm lơgar tìs mờ kơrnoat boh lam; di tŭ yal mờ tus bal yă ală cau lơh tìs...

Ồng Nguyễn Trọng Phú-Chủ tịch UBND xã Ia Pnôn, kơnhoàl Đức Cơ đơs ngan bè nùs nhơm lơh jat bơh làng bol dê: làng bol tàm xã lơh jat niam ală jơnau sồr bè rcang sơndră kòp. Bàr pe nă cau bau mờ bau klau, pơ ùr tàm gah lơgar Campuchia mơya bơh tŭ geh kòp ndrờm ờ lòt rê còp cau pròc mhàm bal. Jơh bal tàm ƀòn, tàm hìu bơnhă geh cau chơ̆t, làng bol kung mìng hòi điện thoại lùp còp, tàm pà bal bơta moat jrùm mờ ờ gŏ lòt rê tai ờ.

Jat tơrgùm kòp bơh Gah đơng lam mpồl ling sền gàr tiah nhàr lơgar càr Gia Lai, tus tŭ do, tàm 7 xã tiah nhàr lơgar bơh càr dê neh geh 7 rơbô 763 hìu tàm 12 rơbô 24  hìu bơnhă kĭ hơ lơh jat niam ală broă lơh rcang sơndră kòp Covid-19 mờ tam dră mờ cau mut tàm lơgar, dô gan tiah nhàr lơgar. Đại úy Nguyễn Viết Hoàn-Chính trị viên phó Pôs đồng ling sền gàr tiah nhàr lơgar Ia O, kơnhoàl Ia Grai pà gĭt: Mpồl ling neh pơgồp bal mờ tiah do hòi jà mờr 50% ală hìu bơnhă làng bol tàm xã kĭ hơ. Tàm hơ̆, 78 hìu bơnhă geh mìr rềp tiah gùng tiah nhàr lơgar, jrong nhàr lơgar; 265 hìu bơnhă geh pròc mhàm bal rềp ngan mờ làng bol lơgar Campuchia ndrờm neh kĭ hơ. Bơdìh hơ̆, mpồl ling kung ai mpồl ling lòt mblàng yal, hòi jà cau tờm rơndeh pơn diang năc, rơndeh bus, ơhò, plung, kĭ hơ lơh jat niam ală broă lơh rcang sơndră kòp, bañ tus bal dong kờl, pơn diang ală cau dô gan tiah nhàr lơgar... Tơnơ̆ tŭ sền nền ală tơngume mờ kĭ tàm pang sră hơ pơr gon, mò Rơ Mah Hlên (ơm tàm ƀòn Bi, xã Ia O, kơnhoàl Ia Grai) đơs: kòp ngòt rơngơ̆t ngan. Den tàng, làng bol ndrờm lơh jat di ală broă lơh rcang sơndră kòp nàng sền gàr pràn kơl dang să jan să tờm dê mờ ală cau gùt dar in.

Tàm tiah nhàr lơgar Ia Mơr, kơnhoàl Chư Prông, broă lơh mblàng yal pơn jat tai geh lơh pràn bơh broă lơh loa pờ tơlik jơnau đơs tàm ală thôn, ƀòn ndrờm pờ sùm tàm ƀùi drim, ƀùi mho mờ jòng 30 phuk dùl ƀùi. Mpồl lơh broă tàm ală Pôs đồng ling sền gàr tiah nhàr lơgar Ia Mơr neh pơgồp bal mờ ală gah, sơnah lơh broă, mpồl cau pờ sùm loa pờ tơlik jơnau đơs ntrờn làm bă tiah nàng yal jơnau yal mờ 2 jơnau đơs hơ̆ là jơnau đơs dà yoan mờ jơnau đơs dà kòn cau Jrai dê tàm tus tơl gùng kòn mờ tus tơl tiah mìr tiah làng bol gam lơh broă. Tàm ală anih sền gròi rcang sơndră kòp, mpồl lơh broă geh gơnoar neh lơh ngan mblàng yal, bơto pơlam làng bol ală broă lơh rcang sơndră kòp. Kra ƀòn Ksor HBlâm (ơm tàm ƀòn Krông, xã Ia Mơr) pà gĭt: Jơnau ntas loa dê ngai lơi kung pờ lơm; Kuang bàng tìp cau lơi kung đơs lơm. Jŏ den tơl jơnau đơs gơ mut tàm bồ tơngoh, lơh tam gơl rơ hời bơta gĭt wă bơh làng bol dê. 100% hìu bơnhă làng bol tàm ƀòn, tàm xã neh tus bal is kĭ hơ lơh jat niam ală broă lơh rcang sơndră kòp, ờ lơh tìs, ờ tàm dong kờl bal mờ ală cau dô gan tiah nhàr lơgar. Jơh ală làng bol ndrờm tơnguh uă nùs nhơm lơh is, sền gŏ khat dùl nă cau ndai mut tàm ù tiah, bulah mờ jơnau kờñ lơi kung ndrờm yal mơ ai mpồl lơh broă geh gơnoar in.

Cau mblàng K’Hạnh