VOV4.K’ho- Jăt jơnau sồr bơh Chính phủ mờ Bộ Y tế dê, Mpồl đơng lam rơcăng sơndră kòp Covid-19 càr, gah lơh sơnơm càr Gia Lai gam jal mhar lơh mhar tŭ tơngai cĭt vaccine rơcăng sơndră kòp Covid-19 dơ̆ 3 nàng kờñ lơh sir gơs broă rơndăp lơh tàm ngai do 18/6.

Dơ̆ 3, càr Gia Lai geh Bộ Y tế pà 27 rbô 880 ding vaccine bơh Covax Facility dê dong kờl nàng lam cĭt rơcăng sơndră kòp ai ală cau geh ai lài cĭt in. Broă cĭt vaccine geh lơh tàm ală anih cĭt tàm Hìu sơnơm dờng càr, Hìu sơnơm 331 mờ Hìu sơnơm ală kơnhoàl, thị xã, ƀòn dờng. Sở Y tế neh sồr ală hìu sơnơm tàm ù tiah càr dê mhar lơh mhar broă lơh cĭt vaccine rơcăng sơndră kòp Covid-19 jăt di jơnau sồr bơh Chính phủ mờ Bộ Y tế dê.

 Cau mblàng Lơ Mu K’Yến