VOV4.K’ho- Tàm dơ\ pơrjum dơ\ 7, Hội đồng Nhân dân càr Gia Lai đơs, nam 2018, càr geh tơl pràn lơh geh jơh ală 20/20 broă lơh sa- mpồl bơtiàn, gơguh kờp jơh phan bơna geh 8%, tă dia jơnhoa rlau jơh bơh lài tus tu\ do bal mờ pơgăp 4.500 tơmàn, priă lơh geh kờp bal dùl nă cau geh rlau 45 tơlak.

Bulah bè hơ\, tu\ do broă lơh sa sươn sre tìp kal ke, tài bơh khà priă ală bơta phan tờm ngan bè tiêu, kau su, kơphê gơmù khà priă uă ngan. Tàm tu\ hơ\, trồ tiah tam gơl nisơna, kòp bơtờp làm bă tiah lơh tờm chi tam ờ geh tơnhàu.

Jat Hội đồng Nhân dân càr Gia Lai dê đơs, ai càn priă sa priă cồng uă mờ sa kuề sa kùa là ală broă pơneh ờ niam ngan tàm tơngai do. Càr geh tus rlau 600 anih ai càn priă sa priă cồng uă. Tàm nam do, bơh lòt sền, càr sền go\ 90 anih lơh tìs bal mờ priă mờr 45 tơmàn, jàu 5 dơ\ broă geh tềl tơngo\ lơh tìs tus anih lơh broă lùp khàu in.

Cau mblàng Lơ Mu K’Yến